ಕಾಮದಹನ, ರಂಗಿನಾಟವಾಡಲು ಜನರಿಗೆ ಸಾಧ್ಯವಾಗಿರಲಿಲ್ಲ. ಆದರೆ, ಈಗ ಪರಿಸ್ಥಿತಿ ಬದಲಾಗಿದೆ. ಎಲ್ಲೆಡೆ ಹಬ್ಬದ ಸಂಭ್ರಮ ಗರಿಗೆದರಿದೆ.
ಸಾರ್ವಜನಿಕರಲ್ಲಿ ರಂಗಿನಾಟದ ಸಂಭ್ರಮ ಮನೆ ಮಾಡಿದರೆ, ರಂಗು ಮಾರಾಟ ಮಾಡುವ ವ್ಯಾಪಾರಿಗಳಲ್ಲಿ ಕೈತುಂಬ ಹಣ ಗಳಿಸುವ ಭರವಸೆ ಮೂಡಿದೆ. ಹಬ್ಬಕ್ಕೆ ಇನ್ನೆರಡು ದಿನಗಳು ಉಳಿದಿವೆ. ಆದರೆ, ವಾರಕ್ಕೂ ಮುಂಚೆಯೇ ನಗರದ ಹಲವು ಬಡಾವಣೆಗಳಲ್ಲಿ ಸಂಭ್ರಮ, ಸಡಗರದ ವಾತಾವರಣ ಸೃಷ್ಟಿಯಾಗಿದೆ. ಯುವಕರು, ಚಿಣ್ಣರು ಗುಂಪು ಕಟ್ಟಿಕೊಂಡು, ತಮಟೆ ಬಾರಿಸುತ್ತ ಮನೆ, ಮನೆಗೆ ತೆರಳಿ ಚಂದಾ ಸಂಗ್ರಹಿಸುತ್ತಿದ್ದಾರೆ. ಕಾಮದಹನ ಕಾರ್ಯಕ್ರಮವನ್ನು ವಿಶಿಷ್ಟವಾಗಿ ಆಚರಿಸಲು ಸಿದ್ಧತೆ ನಡೆಸಿದ್ದಾರೆ. ಅದಕ್ಕೂ ಮಿಗಿಲಾಗಿ ರಂಗಿನಾಟವಾಡಲು ಯೋಜನೆ ಹಾಕಿಕೊಂಡಿದ್ದಾರೆ.
ನಗರದ ಬಹುತೇಕ ಮಳಿಗೆಗಳಲ್ಲಿ ವಿವಿಧ ಬಗೆಯ ನೈಸರ್ಗಿಕ ಬಣ್ಣಗಳನ್ನು ಮಾರಾಟಕ್ಕೆ ಇಡಲಾಗಿದೆ. ಅದರೊಂದಿಗೆ ಪಿಚಕಾರಿ ಸೇರಿದಂತೆ ಚಿಣ್ಣರ ಆಟಿಕೆಗಳನ್ನು ಮಾರುತ್ತಿದ್ದಾರೆ. ಇದು ಸಹಜವಾಗಿಯೇ ಮಕ್ಕಳನ್ನು ಸೆಳೆಯುತ್ತಿದೆ. ಭರ್ಜರಿ ವ್ಯಾಪಾರ ಆಗುತ್ತಿರುವುದರಿಂದ ವ್ಯಾಪಾರಿಗಳ ಮೊಗದಲ್ಲಿ ಮಂದಹಾಸ ಮೂಡಿದೆ.
‘ಈ ಹಿಂದಿನ ಎರಡು ವರ್ಷ ಕೋವಿಡ್ನಿಂದ ಜನ ಬಣ್ಣದಾಟವಾಡಿರಲಿಲ್ಲ. ಖರೀದಿಸಿ ತಂದಿದ್ದ ಬಣ್ಣವೆಲ್ಲ ಹಾಳಾಗಿ ನಷ್ಟ ಉಂಟಾಗಿತ್ತು. ಆದರೆ, ಈ ವರ್ಷ ಕೋವಿಡ್ ಪ್ರಕರಣಗಳು ಬಹುತೇಕ ಕಡಿಮೆಯಾಗಿವೆ. ಹಬ್ಬ ಆಚರಿಸಲು ಸರ್ಕಾರ ಅನುಮತಿ ನೀಡಿದೆ. ಜನ ಉತ್ಸಾಹದಿಂದ ಬಂದು ಬಣ್ಣ ಖರೀದಿಸುತ್ತಿದ್ದಾರೆ’ ಎಂದು ಸ್ಥಳೀಯ ವ್ಯಾಪಾರಿ ಕಿಶನ್ ‘ಪ್ರಜಾವಾಣಿ’ಗೆ ತಿಳಿಸಿದರು.
‘ಜನರಲ್ಲಿ ಸಾಕಷ್ಟು ತಿಳಿವಳಿಕೆ ಬಂದಿದೆ. ಎಲ್ಲರೂ ನೈಸರ್ಗಿಕ ಬಣ್ಣಗಳನ್ನೇ ಹೆಚ್ಚಾಗಿ ಕೇಳುತ್ತಾರೆ. ನಾವು ಕೂಡ ಅವುಗಳನ್ನೇ ಹೆಚ್ಚಾಗಿ ಇಟ್ಟಿದ್ದೇವೆ. ಇನ್ನು, ಮಕ್ಕಳ ಪಿಚಕಾರಿಗಳಿಗೆ ಹೆಚ್ಚಿನ ಬೇಡಿಕೆ ಇದೆ. ಹಬ್ಬಕ್ಕೆ ಇನ್ನೆರಡು ದಿನಗಳು ಉಳಿದಿದ್ದು, ಕೊನೆಯ ದಿನದ ವರೆಗೂ ಮಾರಾಟವಾಗುತ್ತವೆ. ಈ ವರ್ಷ ಹೆಚ್ಚಿನ ಲಾಭ ಸಿಗದಿದ್ದರೂ ಕನಿಷ್ಠ ನಷ್ಟವಾದರೂ ಉಂಟಾಗುವುದಿಲ್ಲ’ ಎಂದು ಹೇಳಿದರು.
‘ಎರಡು ವರ್ಷ ರಂಗಿನಾಟ ಆಡಿರಲಿಲ್ಲ. ಈ ವರ್ಷ ಮನೆಯವರು, ಸ್ನೇಹಿತರೊಂದಿಗೆ ಕೂಡಿಕೊಂಡು ಬಣ್ಣದಾಟ ಆಡುತ್ತೇವೆ. ಕಾಮದಹನಕ್ಕೂ ವ್ಯವಸ್ಥೆ ಮಾಡಲಾಗಿದೆ. ಹಬ್ಬ ಅಂದರೆ ಸಂಭ್ರಮ ಇರಬೇಕು ತಾನೇ?’ ಎಂದು ಪ್ರಶ್ನಿಸಿದರು ಸ್ಥಳೀಯ ಯುವಕರಾದ ರಾಜೇಶ್, ಕರಣ್.
ಹಂಪಿಯಲ್ಲೂ ರಂಗಿನಾಟ
ಕೋವಿಡ್ ಪ್ರಕರಣಗಳ ಸಂಖ್ಯೆ ಬಹಳಷ್ಟು ತಗ್ಗಿರುವುದರಿಂದ ದೇಶ-ವಿದೇಶಗಳಿಂದ ಹಂಪಿಗೆ ಬರುವವರ ಸಂಖ್ಯೆ ದಿನೇ ದಿನೇ ಹೆಚ್ಚಾಗುತ್ತಿದೆ. ಅದರಲ್ಲೂ ಹೋಳಿ ಹಬ್ಬದ ರಂಗಿನಾಟಕ್ಕೆಂದೇ ವಿದೇಶಿಯರು ಮೊದಲಿನಿಂದಲೂ ಹಂಪಿಗೆ ಬರುತ್ತಾರೆ. ಈ ಹಿಂದಿನ ಎರಡು ವರ್ಷ ಬಂದಿರಲಿಲ್ಲ. ಆದರೆ, ಈ ವರ್ಷ ಬರುವ ನಿರೀಕ್ಷೆ ಇದೆ ಎಂದು ಸ್ಥಳೀಯ ನಿವಾಸಿ ರಾಚಯ್ಯ, ರಾಜು ತಿಳಿಸಿದರು.
ವಿದೇಶಿಯರು ಸ್ಥಳೀಯರೊಂದಿಗೆ ಬೆರೆತು, ಮೈಮರೆತು ಹಂಪಿಯಲ್ಲಿ ಹೋಳಿ ರಂಗಿನಾಟದಲ್ಲಿ ಭಾಗವಹಿಸಿ ಕುಣಿದು ಕುಪ್ಪಳಿಸುತ್ತಾರೆ. ಈ ಕಾರಣಕ್ಕೆ ಹಂಪಿಯಲ್ಲಿ ಆಚರಿಸಲಾಗುವ ಹೋಳಿಗೆ ವಿಶೇಷ ಮಹತ್ವವಿದೆ.
ಇತ್ತೀಚಿನ ಸುದ್ದಿಗಳಿಗಾಗಿ ಈಗಲೇ ಡೌನ್ ಲೋಡ್ ಮಾಡಿ:
https://plಇay.google.com/store/apps/details?id=com.speed.newskannada