ಗೆಲುವಿನ ಕನವರಿಕೆಯಲ್ಲಿರುವ ಕೊಲ್ಕತ್ತಾ ನೈಟ್ ರೈಡರ್ಸ್ ತಂಡಕ್ಕೆ ಮತ್ತೊಂದು ಆಘಾತ ಎದುರಾಗಿದೆ. ಕೊಲ್ಕತ್ತಾ ತಂಡದ ವೇಗದ ಬೌಲರ್ ಅಲಿಖಾನ್ ಗಾಯಕ್ಕೆ ತುತ್ತಾಗಿದ್ದು, 13 ನೇ ಆವೃತ್ತಿಯ ಟೂರ್ನಿಯಿಂದ ಹೊರ ನಡೆದಿದ್ದಾರೆ. ಅಲಿಖಾನ್ ಮೂಲತಃ ಅಮೆರಿದಕವರಾಗಿದ್ದು, ವಿಶ್ವದ ಶ್ರೀಮಂತ ಟೂರ್ನಿ ಇಂಡಿಯನ್ ಪ್ರೀಮಿಯರ್ ಲೀಗ್ ನಲ್ಲಿ ಸ್ಥಾನ ಪಡೆದ ಮೊದಲ ಅಮೆರಿಕ ಆಟಗಾರ ಎಂಬ ಹಿರಿಮೆಗೂ ಪಾತ್ರರಾಗಿದ್ದರು. ಕೊಲ್ಕತ್ತಾ ತಂಡವು ಡಿಸೆಂಬರ್ ನಲ್ಲಿ ನಡೆದ ಹರಾಜು ಪ್ರಕ್ರಿಯೆಯಲ್ಲಿ ಕ್ರಿಕೆಟ್ ಜನಕರ ನಾಡಿನ ವೇಗಿ ಹ್ಯಾರಿ ಗರ್ನೆ ರನ್ನು ಖರೀದಿಸಿತ್ತು. ವೇಗಿ ಹ್ಯಾರಿ ಗರ್ನೆ ಗಾಯಕ್ಕೆ ತುತ್ತಾಗಿದ್ದ ಕಾರಣ ಅವರ ಬದಲಿಗೆ ಕೆಕೆಆರ್ ಫ್ರಾಂಚೈಸಿಗಳು ಅಲಿಖಾನ್ ರನ್ನು ತಂಡಕ್ಕೆ ಸೇರಿಸಿಕೊಂಡಿದ್ದರು. ದುರದೃಷ್ಟವಶಾತ್ ಇದೀಗ ಅಲಿಖಾನ್ ಕೂಡ ಗಾಯಕ್ಕೆ ತುತ್ತಾಗಿ 13 ನೇ ಆವೃತಿಯ ಐಪಿಎಲ್ ಟೂರ್ನಿಯನ್ನು ತೊರೆದಿದ್ದಾರೆ.
ಕೆಕೆಆರ್ ಈ ಭಾರಿಯ ಟೂರ್ನಿಯಲ್ಲಿ ನಾಲ್ಕು ಪಂದ್ಯಗಳನ್ನಾಡಿದ್ದು, 4 ಪಂದ್ಯದಲ್ಲಿ ಕೂಡ ಅಲಿಖಾನ್ ಸಂಭಾವ್ಯ ತಂಡದಲ್ಲಿ ಸ್ಥಾನ ಪಡೆದುಕೊಂಡಿರಲಿಲ್ಲ. ಮುಂದಿನ ದಿನಗಳಲ್ಲಿ ಅಲಿಖಾನ್ ಕೆಕೆಆರ್ ಜರ್ಸಿ ತೊಡುವುದು ಪಕ್ಕಾ ಆಗಿತ್ತು. ಆದರೆ ಇದೀಗ ಗಾಯದಿಂದ ಟೂರ್ನಿ ತೊರೆದಿರುವುದು ಕೆಕೆಆರ್ ಗೆ ಭಾರಿ ಹಿನ್ನೆಡೆಯಾಗಲಿದೆ. ಇಂದು ಕೆಕೆಆರ್ ತಂಡವು ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಸವಾಲನ್ನು ಎದುರಿಸಲಿದೆ.ಉಭಯ ತಂಡಗಳು ಬಲಿಷ್ಠವಾಗಿದ್ದು, ಕೊಲ್ಲಿ ರಾಷ್ಟ್ರದಲ್ಲಿಂದು ಪ್ರಬಲರ ನಡುವೆ ಕದನ ನಡೆಯಲಿದೆ.
