ಕೇಪ್ ಟೌನ್: ದಕ್ಷಿಣ ಆಫ್ರಿಕಾ ವಿರುದ್ಧದ ಮೂರನೇ ಏಕದಿನ ಪಂದ್ಯದ ವೇಳೆ ಪ್ರಸಾರಕರು ತೋರಿಸಿದ ತನ್ನ ಪುಟ್ಟ ಮಗುವಿನ ಚಿತ್ರ ನಮಗೆ ಗೊತ್ತಿಲ್ಲದೆ ತೆಗೆದ ಚಿತ್ರವಾಗಿದ್ದು ತಮ್ಮ ಮಗಳು ವಾಮಿಕಾ ಅವರ ಚಿತ್ರಗಳನ್ನು ಪ್ರಕಟಿಸದಂತೆ ಮಾಧ್ಯಮಗಳಿಗೆ ಭಾರತ ಬ್ಯಾಟರ್ ವಿರಾಟ್ ಕೊಹ್ಲಿ ಸೋಮವಾರ ವಿನಂತಿಸಿದ್ದಾರೆ.
ಕೊಹ್ಲಿ ಹಾಗೂ ಅವರ ಪತ್ನಿ ಅನುಷ್ಕಾ ಶರ್ಮಾ ಅವರು ಈ ತಿಂಗಳ ಆರಂಭದಲ್ಲಿ 1 ವರ್ಷಕ್ಕೆ ಕಾಲಿಟ್ಟಿರುವ ತಮ್ಮ ಮಗುವಿನ ಚಿತ್ರಗಳನ್ನು ಪ್ರಕಟಿಸದಂತೆ ಮಾಧ್ಯಮಗಳಿಗೆ ಪದೇ ಪದೇ ಕೇಳಿಕೊಂಡಿದ್ದಾರೆ.
ಆದರೆ, ರವಿವಾರ ನಡೆದ ಮೂರನೇ ಏಕದಿನ ಪಂದ್ಯದಲ್ಲಿ ಕೊಹ್ಲಿ ಅರ್ಧ ಶತಕ ಬಾರಿಸಿದಾಗ ಕ್ಯಾಮರಾಗಳು ಅನುಷ್ಕಾ ಶರ್ಮಾ ಅವರತ್ತ ತಿರುಗಿದ್ದವು. ಅಲ್ಲಿ ಅವರು ತಮ್ಮ ಪುತ್ರಿಯನ್ನು ಹಿಡಿದುಕೊಂಡು ಸಂಭ್ರಮಿಸುತ್ತಿದ್ದರು.
ಕೆಲವೇ ನಿಮಿಷಗಳಲ್ಲಿ, ಟ್ವಿಟ್ಟರ್ ನಲ್ಲಿ #Vamika ಟ್ರೆಂಡಿಂಗ್ ಯೊಂದಿಗೆ ವೀಡಿಯೊ ವೈರಲ್ ಆಗಿದೆ. ಮಗುವಿನ ಮುಖದ ಸ್ಕ್ರೀನ್‌ಶಾಟ್‌ಗಳನ್ನು ಸಾಮಾಜಿಕ ಮಾಧ್ಯಮ ವೇದಿಕೆಯಲ್ಲಿ ವ್ಯಾಪಕವಾಗಿ ಹಂಚಿಕೊಳ್ಳಲಾಗಿದೆ.
” ನಿನ್ನೆ ನಮ್ಮ ಹೆಣ್ಣುಮಗುವಿನ ಚಿತ್ರಗಳನ್ನು ಕ್ರೀಡಾಂಗಣದಲ್ಲಿ ಸೆರೆಹಿಡಿಯಲಾಗಿದೆ ಹಾಗೂ ನಂತರ ವ್ಯಾಪಕವಾಗಿ ಹಂಚಿಕೊಳ್ಳಲಾಗಿದೆ ಎಂದು ನಾವು ಅರಿತುಕೊಂಡಿದ್ದೇವೆ. ನಾವು ಆಕಸ್ಮಿಕವಾಗಿ ಕ್ಯಾಮರ ಕಣ್ಣಲ್ಲಿ ಸೆರೆಯಾಗಿದ್ದೇವೆ ಹಾಗೂ ಕ್ಯಾಮೆರಾ ನಮ್ಮ ಮೇಲೆ ಇದೆ ಎಂದು ತಿಳಿದಿರಲಿಲ್ಲ ಎಂದು ನಾವು ಎಲ್ಲರಿಗೂ ತಿಳಿಸಲು ಬಯಸುತ್ತೇವೆ. ಈ ವಿಷಯದ ಬಗ್ಗೆ ನಮ್ಮ ನಿಲುವು ಮತ್ತು ವಿನಂತಿಯು ಒಂದೇ ಆಗಿರುತ್ತದೆ. ನಾವು ಹಿಂದೆ ವಿವರಿಸಿದ ಕಾರಣಗಳಿಗಾಗಿ ವಾಮಿಕಾ ಅವರ ಚಿತ್ರಗಳನ್ನು ಕ್ಲಿಕ್ ಮಾಡದಿದ್ದರೆ / ಪ್ರಕಟಿಸದಿದ್ದರೆ ನಾವು ನಿಜವಾಗಿಯೂ ಪ್ರಶಂಸಿಸುತ್ತೇವೆ. ಧನ್ಯವಾದಗಳು!” ಎಂದು ಕೊಹ್ಲಿ ಹಾಗೂ ಅನುಷ್ಕಾ Instagram ನಲ್ಲಿ ಬರೆದಿದ್ದಾರೆ.
ಕಳೆದ ತಿಂಗಳು ದಕ್ಷಿಣ ಆಫ್ರಿಕಾಕ್ಕೆ ತೆರಳುವ ಮೊದಲು ತಂಡದ ಬಸ್‌ನಿಂದ ಇಳಿಯುವಾಗ ಕೊಹ್ಲಿ ವಿಮಾನ ನಿಲ್ದಾಣದ ಗೇಟ್‌ಗಳ ಹೊರಗೆ ನಿಂತಿದ್ದ ಕ್ಯಾಮರಾಮನ್ ಗಳಿಗೆ ತಮ್ಮ ಮಗಳ ಚಿತ್ರಗಳನ್ನು ತೆಗೆಯದಂತೆ ವಿನಂತಿಸಿದ್ದರು.
ಇತ್ತೀಚಿನ ಸುದ್ದಿಗಳಿಗಾಗಿ ಈಗಲೇ ಡೌನ್‌ ಲೋಡ್‌ ಮಾಡಿ:
https://play.google.com/store/apps/details?id=com.speed.newskannada
