ವನ್ಯಜೀವಿಗಳ ಸ್ವಚ್ಛಂದ ಬದುಕಿನ ದೃಶ್ಯಗಳನ್ನು ನೋಡುವುದೇ ಚೆಂದ. ಸೂಕ್ಷ್ಮವಾಗಿ ಗಮನಿಸಿದಾಗ ಸಾಕಷ್ಟು ಅದ್ಭುತ ದೃಶ್ಯಗಳು ನಮಗಿಲ್ಲಿ ಕಾಣಸಿಗುತ್ತವೆ. ಇಂತಹ ಕುತೂಹಲಕಾರಿ ದೃಶ್ಯಗಳು ಸಹಜವಾಗಿಯೇ ನಮ್ಮನ್ನು ಸೆಳೆಯುವ ಜತೆಗೆ, ಒಂದೊಂದು ಸಲ ಹುಬ್ಬೇರಿಸುವಂತೆಯೂ ಮಾಡುತ್ತವೆ. ಈಗಂತು ಸೋಶಿಯಲ್ ಮೀಡಿಯಾದಲ್ಲಿ ಇಂತಹ ಹಲವಾರು ವಿಡಿಯೋಗಳು ಕಾಣಸಿಗುತ್ತವೆ. ಇಂತಹ ಖುಷಿ ನೀಡುವ ದೃಶ್ಯಗಳ ಸಾಲಿಗೆ ಈಗ ಇನ್ನೊಂದು ವಿಡಿಯೋ ಸೇರ್ಪಡೆಯಾಗಿದೆ.ಕೋತಿಗಳು ಮನುಷ್ಯರನ್ನೇ ಅನುಕರಣೆ ಮಾಡುವ ದೃಶ್ಯಗಳು ಹೊಸದೇನೂ ಅಲ್ಲ. ನೀವು ಕೂಡಾ ಇಂತಹ ಸಾಕಷ್ಟು ದೃಶ್ಯಗಳನ್ನು ನೋಡಿರಬಹುದು. ಅದೂ ಅಲ್ಲದೆ, ಕೆಲವೊಮ್ಮೆ ಇವುಗಳು ಯೋಚಿಸುವ ರೀತಿ, ತೋರುವ ವರ್ತನೆ ಕೂಡಾ ಅಚ್ಚರಿ ಮೂಡಿಸುತ್ತದೆ. ಈ ದೃಶ್ಯವನ್ನು ನೋಡುವಾಗಲೂ ನಿಮಗೆ ಇದೇ ಅನುಭವವಾಗಬಹುದು.ಎಂಬ ಇನ್ಸ್ಟಾಗ್ರಾಂ ಖಾತೆಯಲ್ಲಿ ಈ ವಿಡಿಯೋವನ್ನು ಹಂಚಿಕೊಳ್ಳಲಾಗಿದೆ. ಎರಡು ಕೋತಿಗಳ ದೃಶ್ಯವಿದು. ಇದರಲ್ಲಿ ಒಂದು ಕೋತಿ ಇನ್ನೊಂದು ಕೋತಿಯ ಕಣ್ಣುಗಳ ಆರೈಕೆ ಮಾಡುವುದನ್ನು ನೋಡಬಹುದು. ಎಲೆಗಳ ಸಹಾಯದಿಂದ ಇದು ಕಣ್ಣಿನ ಆರೈಕೆ ಮಾಡುತ್ತದೆ. ಒಂದು ಎಲೆಯ ಮೂಲಕ ಕಣ್ಣನ್ನು ಸ್ವಚ್ಛಗೊಳಿಸುವ ಕೋತಿ ಬಳಿಕ ಇನ್ನೊಂದು ಎಲೆಯನ್ನು ಕೈಯಲ್ಲಿ ಸರಿಯಾದ ರೀತಿಯಲ್ಲಿ ಹಿಡಿದು ಕಣ್ಣಿನ ಆರೈಕೆ ಮಾಡಿದೆ. ಇನ್ನೊಂದು ಕೋತಿ ತನ್ನ ಕಣ್ಣನ್ನು ಸ್ವಚ್ಛಗೊಳಿಸುವಾಗ ಈ ಕೋತಿ ಬಲು ಶಾಂತವಾಗಿ ಕುಳಿತು ಅದಕ್ಕೆ ಸಹಕರಿಸುವುದನ್ನು ಇಲ್ಲಿ ಗಮನಿಸಬಹುದು. ಈ ಕೋತಿ ಏನು ಮಾಡುತ್ತಿದೆ ಎಂಬುದು ಸ್ಪಷ್ಟವಾಗಿ ಗೊತ್ತಾಗದಿದ್ದರೂ, ಬಹುಶಃ ಒಂದು ಕೋತಿಯ ಕಣ್ಣಿನಲ್ಲಿ ಏನೋ ಸಮಸ್ಯೆ ಇದ್ದಂತಿದೆ. ಹೀಗಾಗಿ, ಅದನ್ನು ಸರಿಪಡಿಸಲು ಈ ಕೋತಿ ಸಹಾಯ ಮಾಡುತ್ತಿದ್ದಂತೆ ತೋರುತ್ತದೆ ಅಥವಾ ಈ ಕೋತಿಯ ಕಣ್ಣಿಗೆ ಬಿದ್ದ ಕಸವನ್ನು ಈ ಮಂಗ ತೆಗೆಯುತ್ತಿದೆಯೇನೋ ಎಂದೆನಿಸುತ್ತದೆ.
ಇತ್ತೀಚಿನ ಸುದ್ದಿಗಳಿಗಾಗಿ ಈಗಲೇ ಡೌನ್ ಲೋಡ್ ಮಾಡಿ:
https://play.google.com/store/apps/details?id=com.speed.newskannada