ಬಸ್ ಗಳಲ್ಲಿ ಇದ್ದಕ್ಕಿದ್ದಂತೆ ಬೆಂಕಿ ಕಾಣಿಸಿಕೊಳ್ಳೋಕೆ ವಿನ್ಯಾಸ ದೋಷವೇ ಕಾರಣ ಅನ್ನೋದು ಬೆಳಕಿಗೆ ಬಂದಿದೆ. ಸದ್ಯ ಅಶೋಕ್ ಲೈಲೆಂಡ್ ಕಂಪನಿಯ ಸುಮಾರು 189 ಬಸ್ ಗಳು ಬಿಎಂಟಿಸಿಯಲ್ಲಿವೆ. 9 ಮೀಟರ್ ಉದ್ದದ ಮಿನಿ ಬಸ್ ನಲ್ಲಿ ಈ ಹಿಂದೆ ಬೆಂಕಿ ಕಾಣಿಸಿಕೊಂಡಿತ್ತು.
ವಿನ್ಯಾಸ ದೋಷವೇ ಕಾರಣ
ಬಸ್ ನ ಸ್ಟಾರ್ಟರ್ ಹಾಗೂ ಡಿಸೇಲ್ ಪೈಪ್ ಅಕ್ಕಪಕ್ಕ ಇರೋದು ಬೆಂಕಿ ಹತ್ತಿಕೊಳ್ಳಲು ಕಾರಣ ಎಂದು ತನಿಖಾ ವರದಿಯಲ್ಲಿ ಹೇಳಲಾಗಿದೆ. ಸ್ಟಾರ್ಟರ್ ನಲ್ಲಿ ಶಾರ್ಟ್ ಸರ್ಕ್ಯೂಟ್ ಆದ ತಕ್ಷಣವೇ ಡಿಸೇಲ್ ಪೈಪ್ ಗೆ ಕಿಡಿ ತಗುಲಿ ಬೆಂಕಿ ಕಾಣಿಸಿಕೊಂಡಿದೆ. ಸಾಮಾನ್ಯವಾಗಿ ದೊಡ್ಡ ಬಸ್ ಗಳಲ್ಲಿ ಪ್ರತ್ಯೇಕವಾಗಿ ಕೇಬಲ್ ಗಳು ಇರಲಿವೆ. ಮಿನಿ ಬಸ್ ಆಗಿರೋದ್ರಿಂದ ಸ್ಟಾರ್ಟರ್ ಹಾಗೂ ಡಿಸೇಲ್ ಪೈಪ್ ಅಕ್ಕಪಕ್ಕ ಇಡಲಾಗಿದೆ. ಈ ವಿನ್ಯಾಸ ದೋಷವೇ ಬೆಂಕಿ ಹತ್ತಿಕೊಳ್ಳಲು ಕಾರಣ.
ಎಚ್ಚೆತ್ತ ಬಿಎಂಟಿಸಿ ತಾಂತ್ರಿಕ ವಿಭಾಗ
ಸಾಲು ಸಾಲು ಬಸ್ ಗಳು ಬೆಂಕಿಗೆ ಆಹುತಿ ಆಗುತ್ತಿರೋದರಿಂದ ಬಿಎಂಟಿಸಿ ತಾಂತ್ರಿಕ ವಿಭಾಗ ಎಚ್ಚೆತ್ತುಕೊಂಡಿದೆ. ಇದೀಗ ವಿನ್ಯಾಸ ಬದಲಾವಣೆ ಬಿಎಂಟಿಸಿ ಮುಂದಾಗಿರುವ ಮಾಹಿತಿ ಲಭ್ಯವಾಗಿದೆ. ಸದ್ಯ ತನ್ನ ಬಳಿಯಲ್ಲಿರುವ 189 ಮಿನಿ ಬಸ್ ಗಳಲ್ಲೂ ವಿನ್ಯಾಸ ಬದಲಾವಣೆ ಮಾಡಲು ಬಿಎಂಟಿಸಿ ನಿರ್ಧರಿಸಿದೆ.
ಈಗಾಗಲೇ 40 ಬಸ್ ಗಳ ವಿನ್ಯಾಸ ಬದಲಾವಣೆ ಮಾಡಿ ವಾಹನಗಳನ್ನು ರಸ್ತೆಗೆ ಇಳಿಸಿದೆ. 2014 ರಲ್ಲಿ ಬಿಎಂಟಿಸಿ ಮಿನಿ ಬಸ್ ಗಳನ್ನ ಖರೀದಿ ಮಾಡಿತ್ತು.
ಪ್ರಯಾಣಿಕರ ಆತಂಕ ದೂರ ಮಾಡಿದ ಬಿಎಂಟಿಸಿ
ಪ್ರಯಾಣಿಕರು ಪ್ರಯಾಣಿಸುತ್ತಿದ್ದ ಬಸ್ ಗಳು ಬೆಂಕಿಗೆ ತುತ್ತಾಗುತ್ತಿದ್ದರಿಂದ ಜನರು ಆತಂಕಕ್ಕೆ ಒಳಗಾಗಿದ್ದರು. ತಾವು ದಿನನಿತ್ಯ ಪ್ರಯಾಣ ಮಾಡುತ್ತಿರುವ ಬಸ್ ಗಳು ಎಷ್ಟು ಸುರಕ್ಷಿತ ಅನ್ನೊ ಪ್ರಶ್ನೆ ಮೂಡಿತ್ತು. ಪ್ರಯಾಣಿಕರ ಆತಂಕ ದೂರ ಮಾಡುವ ನಿಟ್ಟಿನಲ್ಲಿ ಬಿಎಂಟಿಸಿ ತನಿಖೆ ನಡೆಸಿ, ಬಸ್ ಗಳ ವಿನ್ಯಾಸ ಬದಲಿಸಲು ಮುಂದಾಗಿದೆ.
ನಡುರಸ್ತೆಯಲ್ಲಿಯೇ ಹೊತ್ತಿ ಉರಿದ ಬಸ್ ಗಳು
ಜನವರಿ 21 ರಂದು ಚಾಮರಾಜಪೇಟೆಯ ಮಕ್ಕಳ ಕೂಟ ಸರ್ಕಲ್ ಬಳಿ, ಫೆಬ್ರವರಿ 1 ರಂದು ಜಯನಗರ ಸೌತ್ ಎಂಡ್ ಸರ್ಕಲ್ ಮೆಟ್ರೋ ಸ್ಟೇಷನ್ ರಸ್ತೆಯಲ್ಲಿ ಎರಡು ಬಿಎಂಟಿಸಿ ಬಸ್ ಗಳು ಪ್ರಯಾಣಿಕರನ್ನ ಹೊತ್ತು ಸಾಗುತ್ತಿರುವಾಗಲೇ ಧಗಧಗ ಹೊತ್ತಿ ಉರಿದಿದ್ದವು. ಬಸ್ಸಿನಲ್ಲಿ ಏಕಾಏಕಿ ಬೆಂಕಿ ಕಾಣಿಸಿಕೊಂಡು, ನಡುರಸ್ತೆಯಲ್ಲೇ ಬಸ್ಸುಗಳು ಹೊತ್ತಿ ಉರಿದಿದ್ದವು.
ಚಾಲಕ ಮತ್ತು ನಿರ್ವಾಹಕರ, ಸಾರ್ವಜನಿಕರ ಸಮಯ ಪ್ರಜ್ಞೆ ಯಿಂದ ಅದೃಷ್ಟವಶಾತ್ ಯಾವುದೇ ಪ್ರಾಣಹಾನಿಯಾಗಲಿಲ್ಲ. ಬಸ್ಸುಗಳಿಗೆ ಮಾತ್ರ ಬೆಂಕಿ ಕೆನ್ನಾಲಿಗೆಗೆ ಉರಿದು ಸುಟ್ಟು ಕರಕಲಾಯಿತು. 11 ದಿನಗಳ ಅಂತರದಲ್ಲೇ ಈ ಎರಡು ಘಟನೆಗಳು ಸಂಭವಿಸಿದ ಹಿನ್ನೆಲೆ ಸಹಜವಾಗೇ ಬಿಎಂಟಿಸಿ ಪ್ರಯಾಣಿಕರಲ್ಲಿ ಬಸ್ಸಿನಲ್ಲಿ ಪ್ರಯಾಣ ಮಾಡುವ ಬಗ್ಗೆ ಆತಂಕ ಮೂಡಿಸಿತ್ತು.
ಇತ್ತೀಚಿನ ಸುದ್ದಿಗಳಿಗಾಗಿ ಈಗಲೇ ಡೌನ್ ಲೋಡ್ ಮಾಡಿ:
https://play.google.com/store/apps/details?id=com.speed.newskannada