ಮದುವೆ ಹೆಸರಿನಲ್ಲಿ ವಂಚನೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮಾಲಿವುಡ್ ನಟಿ ಶಾಮ್ನಾ ಕಾಸಿಂ ಕೊನೆಗೂ ಮೌನ ಮುರಿದಿದ್ದಾರೆ. ಮಾಧ್ಯಮ ಸಂದರ್ಶನವೊಂದರಲ್ಲಿ ಮಾತನಾಡಿರುವ ಶಾಮ್ನಾ, ನಾನು ಶೂಟಿಂಗ್ನಲ್ಲಿ ಬಿಜಿಯಾಗಿರುವ ಸಮಯದಲ್ಲಿ ನನ್ನ ಕುಟುಂಬ ನನಗೆ ಮದುವೆ ಮಾಡಲು ವರ ಹುಡುಕುತ್ತಿದ್ದರು. ಇದೇ ವೇಳೆ ವರನ ಕುಟುಂಬ ಎಂದು ಹೇಳಿಕೊಂಡು ವಂಚಕರ ಜಾಲವೊಂದು ನಮ್ಮ ಕುಟುಂಬವನ್ನು ಸಂಪರ್ಕಿಸಿತು. ಆರಂಭದಲ್ಲಿ ಎಲ್ಲವೂ ಸರಿಯಾಗಿತ್ತು. ನಂತರದ ದಿನಗಳಲ್ಲಿ ಅವರು ನೀಡಿರುವ ಫೋಟೋ, ಹೆಸರು ಹಾಗೂ ವಿಳಾಸ ನಕಲಿ ಎಂದು ತಿಳಿಯಿತು. ಇದರಲ್ಲಿ ಭಾಗಿಯಾಗಿರುವ ಎಲ್ಲ ಆರೋಪಿಗಳನ್ನು ಸದ್ಯ ಬಂಧಿಸಲಾಗಿದ್ದು, ಅವರೆಲ್ಲರಿಗೂ ಈಗಾಗಲೇ ಮದುವೆಯಾಗಿದ್ದು, ಮಕ್ಕಳು ಸಹ ಇದ್ದಾರೆ. ಆರೋಪಿಗಳು ನನಗೆ ಮತ್ತು ನನ್ನ ಕುಟುಂಬಕ್ಕೆ ವಂಚನೆ ಮಾಡಿದರು. ಬಹುಶಃ ಈ ಕೆಟ್ಟ ಕ್ಷಣವನ್ನು ನಾನು ಮರೆಯಬಹುದು. ಆದರೆ, ಇದೇ ಅನುಭವ ಹೊಂದಿದ ಕೆಲ ಯುವತಿಯರು ಮಾನಸಿಕವಾಗಿ ಕುಗ್ಗಿ ಆತ್ಮಹತ್ಯೆ ಮಾಡಿಕೊಂಡವರ ಪರಿಸ್ಥಿತಿ ಏನೆಂಬುದು ನನಗೆ ಅರ್ಥವಾಗುತ್ತಿದೆ.
