ಉತ್ತರ ಪ್ರದೇಶದ ವಾರಾಣಸಿಯಲ್ಲಿ ಬಿಹಾರ ಸಚಿವ ತೇಜ್ ಪ್ರತಾಪ್ ಆಪ್ತರ ಬ್ಯಾಗ್ಗಳನ್ನು ಹೋಟೆಲ್ ಸಿಬ್ಬಂದಿ ಹೊರ ಹಾಕಿದ್ದಾರೆ ಎಂದು ಪೊಲೀಸರಿಗೆ ದೂರು ನೀಡಲಾಗಿದೆ.
ವಾರಾಣಸಿ (ಉತ್ತರ ಪ್ರದೇಶ): ಆರ್ಜೆಡಿ ವರಿಷ್ಠ ಲಾಲು ಪ್ರಸಾದ್ ಯಾದವ್ ಅವರ ಹಿರಿಯ ಪುತ್ರ, ಬಿಹಾರ ಸಚಿವ ತೇಜ್ ಪ್ರತಾಪ್ ಯಾದವ್ ಉತ್ತರ ಪ್ರದೇಶದ ವಾರಾಣಸಿಗೆ ಭೇಟಿ ನೀಡಿದ್ದಾರೆ.
ಇಲ್ಲಿ ತೇಜ್ ಪ್ರತಾಪ್ ಮತ್ತು ಆಪ್ತರು ಹೋಟೆಲ್ವೊಂದರಲ್ಲಿ ತಂಗಿದ್ದಾರೆ. ಆದರೆ, ಹೋಟೆಲ್ನ ಕೊಠಡಿಯಿಂದ ಆಪ್ತರ ಬ್ಯಾಗ್ಗಳು ಮತ್ತು ಇತರ ವಸ್ತುಗಳನ್ನು ಹೊರ ಹಾಕಿರುವ ಆರೋಪ ಕೇಳಿ ಬಂದಿದೆ.
ಶುಕ್ರವಾರ ಮಧ್ಯಾಹ್ನ ಕಾಶಿಗೆ ಸಚಿವ ತೇಜ್ ಪ್ರತಾಪ್ ಬಂದಿದ್ದರು. ನಂತರ ತಡರಾತ್ರಿ ತೇಜ್ ಪ್ರತಾಪ್ ಯಾದವ್ ವಾರಾಣಸಿಯ ಸಿಗ್ರಾ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿರುವ ಹೋಟೆಲ್ಗೆ ತಲುಪಿದ್ದರು. ಪೂಜೆ ಸಲ್ಲಿಸಿ ರಾತ್ರಿ ಹೋಟೆಲ್ಗೆ ಹಿಂತಿರುಗಿದಾಗ ಆಪ್ತರು ಮತ್ತು ಸಿಬ್ಬಂದಿಗಾಗಿ ಕಾಯ್ದಿರಿಸಿದ್ದ ಕೊಠಡಿಯನ್ನು ಖಾಲಿ ಮಾಡಲಾಗಿತ್ತು ಎನ್ನಲಾಗಿದೆ.
ಈ ಬಗ್ಗೆ ಈಟಿವಿ ಭಾರತ್ನೊಂದಿಗೆ ತೇಜ್ ಪ್ರತಾಪ್ ಆಪ್ತ ಸಹಾಯಕರು ದೂರವಾಣಿ ಮೂಲಕ ಮಾತನಾಡಿ, ಸಚಿವರ ವಸ್ತುಗಳು ಕೊಠಡಿಯಿಂದ ತೆಗೆದಿಲ್ಲ ಎಂದು ಸ್ಪಷ್ಟಪಡಿಸಿದರು. ಆದರೆ, ಯಾರಿಗೂ ತಿಳಿಸದೇ ಸಚಿವರ ಆಪ್ತರು ಮತ್ತು ಸಿಬ್ಬಂದಿಯ ಕೊಠಡಿಯನ್ನು ಖಾಲಿ ಮಾಡಲಾಗಿದೆ. ಇದು ಸರಿಯಾದ ಕ್ರಮವಲ್ಲ. ಈ ಬಗ್ಗೆ ಪೊಲೀಸರಿಗೆ ದೂರು ನೀಡಲಾಗಿದೆ. ಸದ್ಯ ಈ ವಿಚಾರದಲ್ಲಿ ಸಂಬಂಧಪಟ್ಟ ಪೊಲೀಸ್ ಅಧಿಕಾರಿಗಳು ಯಾವುದೇ ಪ್ರತಿಕ್ರಿಯೆ ಕೊಟ್ಟಿಲ್ಲ ಎಂದು ತಿಳಿಸಿದರು.
ಮತ್ತೊಂದೆದೆ, ಇನ್ನೊಬ್ಬ ಆಪ್ತ ಪ್ರದೀಪ್ ರಾಯ್ ಮಾತನಾಡಿ, ತೇಜ್ ಪ್ರತಾಪ್ ವಾರಾಣಸಿಗೆ ಬಂದಿದ್ದು, ನಾವೆಲ್ಲರೂ ಅವರನ್ನು ಭೇಟಿಯಾಗಲು ಹೋಟೆಲ್ಗೆ ಬಂದಿದ್ದೇವೆ. ಈ ವೇಳೆ ತೇಜ್ ಪ್ರತಾಪ್ ಯಾದವ್ ತಂಗಿದ್ದ ಕೊಠಡಿಯ ಪಕ್ಕದ ಕೊಠಡಿಯಿಂದ ಸಿಬ್ಬಂದಿಯ ವಸ್ತುಗಳನ್ನು ಹೋಟೆಲ್ ಸಿಬ್ಬಂದಿ ಹೊರಗೆ ತೆಗೆದು ಇಟ್ಟಿದ್ದರು ಎಂದು ಹೇಳಿದರು. ಈ ಬಗ್ಗೆ ಸಿಗ್ರಾ ಠಾಣೆ ಅಧಿಕಾರಿಯೊಬ್ಬರು ಪ್ರತಿಕ್ರಿಯಿಸಿದ್ದು, ಈ ಬಗ್ಗೆ ದೂರು ಸ್ವೀಕರಿಸಲಾಗಿದೆ. ತನಿಖೆ ನಂತರ ಕ್ರಮ ಕೈಗೊಳ್ಳಲಾಗುವುದು ಎಂದು ತಿಳಿಸಿದರು.
https://play.google.com/store/apps/details?id=com.speed.newskannada
