ನವದೆಹಲಿ: ಬ್ರಿಟನ್ ಪ್ರಧಾನಿ ಬೊರಿಸ್ ಜಾನ್ಸನ್ ಎರಡು ದಿನ ಭಾರತಕ್ಕೆ ಭೇಟಿ ನೀಡಿ ಹೋಗಿದ್ದಾರೆ. ಹಿಂದಿನ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರಿಗೆ ಗುಜರಾತ್ ನಲ್ಲಿ ಮೂರು ವರ್ಷಗಳ ಹಿಂದೆ ಅಭೂತಪೂರ್ವ ಸ್ವಾಗತ ಕೋರಿದಂತೆ ಬ್ರಿಟನ್ ಪ್ರಧಾನಿ ಕೂಡ ಗುಜರಾತ್ ಗೆ ಮೊದಲ ದಿನ ಬಂದಿಳಿದರು.
ಗುಜರಾತ್ ನಲ್ಲಿ ಸಬರ್ಮತಿ ಆಶ್ರಮಕ್ಕೆ ಭೇಟಿ ನೀಡಿ ಅಲ್ಲಿನ ವಿಷಯಗಳಿಗೆ ಮಾರುಹೋದ ಬ್ರಿಟನ್ ಪ್ರಧಾನಿ ನಿನ್ನೆ ಶುಕ್ರವಾರ ದೆಹಲಿಯಲ್ಲಿ ಸಂಪೂರ್ಣವಾಗಿ ಕಳೆದರು. ಪ್ರಧಾನಿ ನರೇಂದ್ರ ಮೋದಿ(PM Narendra Modi) ಅವರು ಬ್ರಿಟನ್ ಪ್ರಧಾನಿ ಬೋರಿಸ್ ಜಾನ್ಸನ್ ಅವರೊಂದಿಗೆ ಉಕ್ರೇನ್ ಸಮಸ್ಯೆ ಮಧ್ಯೆ ಸಂತೋಷಕರ ಭೇಟಿಯ ವಾತಾವರಣವನ್ನು ಕಲ್ಪಿಸಿಕೊಟ್ಟರು.
ನಿನ್ನೆ ಉಭಯ ನಾಯಕರು ದೆಹಲಿಯಲ್ಲಿ ಜಂಟಿ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿ ಪರಸ್ಪರ ಮೊದಲ ಹೆಸರಿನ ಪದಗಳಲ್ಲಿ ಸಂಬೋಧಿಸಿದರು, ಬೋರಿಸ್ ತಮ್ಮ ಖಾಸ್ ದೋಸ್ತ್ (ವಿಶೇಷ ಸ್ನೇಹಿತ) ನರೇಂದ್ರ ಅವರಿಗೆ ಅಹಮದಾಬಾದ್ನಲ್ಲಿ ರೋಡ್ಶೋ ಅನ್ನು ಒಳಗೊಂಡಿರುವ ಅಗಾಧ ಸ್ವಾಗತಕ್ಕಾಗಿ ಅಪಾರವಾಗಿ ಧನ್ಯವಾದಗಳನ್ನು ಅರ್ಪಿಸಿದರು. ಸೂಪರ್ಸ್ಟಾರ್ ಅಮಿತಾಬ್ ಬಚ್ಚನ್ ಹೋರ್ಡಿಂಗ್ ಗಳನ್ನು ಗುಜರಾತ್ ನಲ್ಲಿ ಹಾಕಲಾಗಿತ್ತು.
ಮುಕ್ತ ವ್ಯಾಪಾರ ಒಪ್ಪಂದ: ಎರಡೂ ಕಡೆಯವರು ಒಂದು ಸಮಗ್ರ ಮುಕ್ತ ವ್ಯಾಪಾರ ಒಪ್ಪಂದಕ್ಕೆ ಬರಲು ಮುಂದಿನ ದೀಪಾವಳಿ ಗಡುವನ್ನು ನಿಗದಿಪಡಿಸಿದ್ದು, ಈ ಮಧ್ಯೆ ಆರು ಒಪ್ಪಂದಗಳಿಗೆ ಸಹಿ ಹಾಕಿದರು. ದ್ವಿಪಕ್ಷೀಯ ಮಾತುಕತೆಗಳು ರಕ್ಷಣೆ ಮತ್ತು ಭದ್ರತಾ ಸಂಬಂಧಗಳನ್ನು ಹೆಚ್ಚಿಸುವುದು ಸೇರಿದಂತೆ ವ್ಯಾಪಕ ಶ್ರೇಣಿಯನ್ನು ಒಳಗೊಂಡಿವೆ. ಪ್ರಸ್ತಾವನೆಗಳಲ್ಲಿ ಪ್ರಮುಖವಾದುದೆಂದರೆ ಬ್ರಿಟಿಷರ ಉನ್ನತ ಜ್ಞಾನದೊಂದಿಗೆ ಭಾರತದಲ್ಲಿ ಹೊಸ ಯುದ್ಧ ವಿಮಾನವನ್ನು ನಿರ್ಮಿಸುವುದು.
ಉಕ್ರೇನ್ ಆಕ್ರಮಣದ ಬಗ್ಗೆ ರಷ್ಯಾದ ವಿರುದ್ಧದ ತುಲನಾತ್ಮಕವಾಗಿ ಮೃದು ಧೋರಣೆಯನ್ನು ಬ್ರಿಟನ್ ಪ್ರಧಾನಿ ಟೀಕಿಸಿಲ್ಲ, ಆ ಬಗ್ಗೆ ಪ್ರಸ್ತಾಪಿಸಿಯೂ ಇಲ್ಲ. ಮೋದಿಯವರು ವ್ಲಾಡಿಮಿರ್ ಪುಟಿನ್ ಅವರನ್ನು ಸಂಪರ್ಕಿಸಿ ಯುದ್ಧ ಕೊನೆಗೊಳಿಸಲು ಮನವೊಲಿಸಲು ಸಾಕಷ್ಟು ಪ್ರಯತ್ನಿಸಿದ್ದಾರೆ. ಭಾರತೀಯರು ಶಾಂತಿಪ್ರಿಯರು. ಉಕ್ರೇನ್ ನಿರ್ಣಯದ ಬಗ್ಗೆ ಭಾರತ ಮತ್ತು ಬ್ರಿಟನ್ ಎರಡೂ ಆಶಾದಾಯಕವಾಗಿವೆ ಎಂದು ಮೋದಿ ಹೇಳಿರುವುದಾಗಿ ಜಂಟಿ ಸುದ್ದಿಗೋಷ್ಠಿಯಲ್ಲಿ ಬೊರಿಸ್ ಹೇಳಿದ್ದಾರೆ.
ನಾವು ರಷ್ಯಾ-ಉಕ್ರೇನ್ ಯುದ್ಧದಲ್ಲಿ ರಾಷ್ಟ್ರಗಳ ನಡುವಿನ ಮಾತುಕತೆಯ ಮೇಲೆ ಕೇಂದ್ರೀಕರಿಸಿದ್ದೇವೆ. ಎರಡೂ ರಾಷ್ಟ್ರಗಳ ಸಾರ್ವಭೌಮತ್ವ ಮತ್ತು ಸಮಗ್ರತೆಯನ್ನು ಯಾವಾಗಲೂ ಕಾಪಾಡಿಕೊಂಡು ಬಂದಿದ್ದೇವೆ. ಉಭಯ ದೇಶಗಳ ನಡುವಿನ ಬಾಂಧವ್ಯವನ್ನು ಸುಧಾರಿಸಿದ ಕೀರ್ತಿ ಜಾನ್ಸನ್ ಅವರಿಗಿದೆ ಎಂದು ಮೋದಿ ಹೇಳಿದರು.
ಪ್ರಧಾನಿಯಾಗಿ ಬೊರಿಸ್ ಜಾನ್ಸನ್ ಅವರ ಮೊದಲ ಭೇಟಿಯಾಗಿರಬಹುದು, ಆದರೆ ಬೋರಿಸ್ ಭಾರತವನ್ನು ಚೆನ್ನಾಗಿ ತಿಳಿದಿದ್ದಾರೆ. ಭಾರತ-ಯುಕೆ ಸಂಬಂಧಗಳನ್ನು ಹೆಚ್ಚಿಸುವಲ್ಲಿ ಅವರು ಮಹತ್ತರವಾದ ಕೊಡುಗೆ ನೀಡಿದ್ದಾರೆ ಎಂದು ಪ್ರಧಾನಿ ಮೋದಿ ಹೇಳಿದರೆ, ಮಾನವ ಹಕ್ಕುಗಳು ಮತ್ತು ಪ್ರಜಾಪ್ರಭುತ್ವದ ಮೌಲ್ಯಗಳನ್ನು ಎತ್ತಿಹಿಡಿಯುವ ಬಗ್ಗೆ, ಪ್ರತಿಯೊಬ್ಬರ ಹಿತಾಸಕ್ತಿಗಳನ್ನು ಕಾಪಾಡುವ ನಿಬಂಧನೆಗಳನ್ನು ಹೊಂದಿರುವ ತನ್ನ ಸಂವಿಧಾನದ ಪ್ರಕಾರ ಭಾರತ ಕಾರ್ಯನಿರ್ವಹಿಸುತ್ತದೆ ಎಂದು ಜಾನ್ಸನ್ ಹೇಳಿದರು.
ರಷ್ಯಾ ಮತ್ತು ಚೀನಾದಂತಹ ವಿಶ್ವದಾದ್ಯಂತದ ನಿರಂಕುಶಾಧಿಕಾರಗಳಿಗಿಂತ ಭಾರತ ವಿಭಿನ್ನವಾಗಿದೆ ಎಂದು ಜಾನ್ಸನ್ ಹೇಳಿದರು.
ನಾಗರಿಕರ ಸಾವುಗಳನ್ನು ಖಂಡಿಸಿದ ಭಾರತ-ಬ್ರಿಟನ್: ಮೋದಿ ಮತ್ತು ಜಾನ್ಸನ್ ಅವರು ಉಕ್ರೇನ್ನಲ್ಲಿನ ನಾಗರಿಕರ ಸಾವುಗಳನ್ನು ನಿಸ್ಸಂದಿಗ್ಧವಾಗಿ ಖಂಡಿಸಿದ್ದಾರೆ. ಜಗತ್ತಿನಾದ್ಯಂತ, ವಿಶೇಷವಾಗಿ ಅಭಿವೃದ್ಧಿಶೀಲ ರಾಷ್ಟ್ರಗಳಿಗೆ ತೀವ್ರ ಪರಿಣಾಮಗಳನ್ನು ಬೀರುತ್ತಿರುವ ಸಂಘರ್ಷದ ತಕ್ಷಣದ ನಿಲುಗಡೆ ಮತ್ತು ಸಂಘರ್ಷದ ಶಾಂತಿಯುತ ಪರಿಹಾರದ ಅಗತ್ಯವನ್ನು ಪುನರುಚ್ಚರಿಸಿದ್ದಾರೆ.
ಇತ್ತೀಚಿನ ಸುದ್ದಿಗಳಿಗಾಗಿ ಈಗಲೇ ಡೌನ್ ಲೋಡ್ ಮಾಡಿ:
https://plಇay.google.com/store/apps/details?id=com.speed.newskannada