ನವದೆಹಲಿ:ಭಾರತದ ಅತಿದೊಡ್ಡ ಖಾಸಗಿ ಬ್ಯಾಂಕುಗಳಲ್ಲಿ ಒಂದಾದ ಆಯಕ್ಸಿಸ್ ಬ್ಯಾಂಕ್ಇ ದೀಗ ಅಮೆರಿಕ ಮೂಲದ ಸಿಟಿಬ್ಯಾಂಕ್ನ ಭಾರತೀಯ ವ್ಯವಹಾರಗಳನ್ನು ಖರೀದಿಸಿದೆ. ಸಿಟಿಗ್ರೂಪ್ನ ಭಾರತೀಯ ಗ್ರಾಹಕ ವ್ಯವಹಾರ ಮತ್ತು ಸಿಟಿಕಾರ್ಪ್ ಫೈನಾನ್ಸ್ ಸಂಸ್ಥೆಯಿಂದ ಎನ್ಬಿಎಫ್ಸಿ (ಬ್ಯಾಂಕೇತರ ಹಣಕಾಸು) ವ್ಯವಹಾರಗಳ ಖರೀದಿ ಪ್ರಕ್ರಿಯೆಯನ್ನು ಆಯಕ್ಸಿಸ್ ಬ್ಯಾಂಕ್ ಪೂರ್ಣಗೊಳಿಸಿದೆ. ಈ ಡೀಲ್ನ ಮೊತ್ತ ಒಟ್ಟು 11,603 ಕೋಟಿ ರೂಪಾಯಿ ಆಗಿದೆ. ಸಿಟಿಬ್ಯಾಂಕ್ನ 30 ಲಕ್ಷ ಗ್ರಾಹಕರು ಮತ್ತವರ ಖಾತೆಗಳೆಲ್ಲವೂ ಇಂದು ಮಾರ್ಚ್ 1ರಿಂದ ಎಕ್ಸಿಸ್ ಬ್ಯಾಂಕ್ನ ಪಾಲಾಗುತ್ತಿವೆ.
ಅಮೆರಿಕದ ಸಿಟಿಬ್ಯಾಂಕ್ 1902ರಲ್ಲೇ ಭಾರತದಲ್ಲಿ ವ್ಯವಹಾರ ಆರಂಭಿಸಿತ್ತು. ಕೋಲ್ಕತ್ತಾದಲ್ಲಿ ಅದರ ಮೊದಲ ಕಚೇರಿ ಸ್ಥಾಪನೆಯಾಗಿದ್ದು. ಆದರೆ, 120 ವರ್ಷಗಳ ಬಳಿಕ ಸಿಟಿಬ್ಯಾಂಕ್ ಭಾರತದಲ್ಲಿ ಹೆಚ್ಚು ಬೇರೂರುವಲ್ಲಿ ಯಶಸ್ವಿಯಾಗಿಲ್ಲ. ಇದು ಭಾರತದಲ್ಲಿ 18 ನಗರಗಳಲ್ಲಿ ಅಸ್ತಿತ್ವ ಹೊಂದಿದೆ. ಒಟ್ಟು ಏಳು ಕಚೇರಿ, 21 ಬ್ರಾಂಚ್, 500 ಎಟಿಎಂಗಳಿದ್ದು, ಗ್ರಾಹಕರ ಸಂಖ್ಯೆ ಸುಮಾರು 30 ಲಕ್ಷ ಇದೆ.
ಸಿಟಿ ಬ್ಯಾಂಕ್ ಗ್ರಾಹಕರ ಗಮನಕ್ಕೆ:ಇಂದಿನಿಂದ, ಅಂದರೆ ಮಾರ್ಚ್ 1ರಿಂದ ಸಿಟಿ ಬ್ಯಾಂಕ್ ಗ್ರಾಹಕರ ಖಾತೆಗಳು ಮತ್ತು ಹೂಡಿಕೆಗಳು ಆಯಕ್ಸಿಸ್ ಬ್ಯಾಂಕ್ಗೆ ವರ್ಗಾವಣೆ ಆಗುತ್ತವೆ. ಇದು ಬಿಟ್ಟರೆ ಸಿಟಿ ಬ್ಯಾಂಕ್ ಗ್ರಾಹಕರು ಹೆಚ್ಚು ತಲೆಕೆಡಿಸಿಕೊಳ್ಳುವ ಪ್ರಮೇಯ ಇಲ್ಲ. ಸಿಟಿಬ್ಯಾಂಕ್ನ ಗ್ರಾಹಕರ ಅಕೌಂಟ್ ನಂಬರ್, ಡೆಬಿಟ್ ಮತ್ತು ಕ್ರೆಡಿಟ್ ಕಾರ್ಡ್ ನಂಬರ್, ಐಎಫ್ಎಸ್ಸಿ ನಂಬರ್, ಎಂಐಸಿಆರ್ ನಂಬರ್, ಚೆಕ್ ಬುಕ್ ಇತ್ಯಾದಿಯಲ್ಲಿ ಯಾವುದೇ ಬದಲಾವಣೆ ಆಗುವುದಿಲ್ಲ. ಸಿಟಿ ಬ್ಯಾಂಕ್ನ ಬ್ರ್ಯಾಂಡ್ ನೇಮ್ ಕೂಡ ಸದ್ಯಕ್ಕೆ ಹಾಗೆಯೇ ಇರಲಿದೆ ಎಂದು ಸ್ಪಷ್ಟಪಡಿಸಲಾಗಿದೆ.
ಸಿಟಿಬ್ಯಾಂಕ್, ಸಿಟಿ, ಸಿಟಿಗ್ರೂಪ್, ಅದರ ಡಿಸೈನ್, ಟ್ರೇಡ್ಮಾರ್ಕ್ ಇತ್ಯಾದಿ ಎಲ್ಲವನ್ನೂ ಆಯಕ್ಸಿಸ್ ಬ್ಯಾಂಕ್ ತಾತ್ಕಾಲಿಕವಾಗಿ ಬಳಕೆ ಮಾಡಲಿದೆ. ಮುಂದಿನ ದಿನಗಳಲ್ಲಿ ಆಯಕ್ಸಿಸ್ ಬ್ರ್ಯಾಂಡ್ ಹೆಸರಿಗೆ ಇವೆಲ್ಲವೂ ವರ್ಗಾವಣೆ ಆಗುವ ಸಾಧ್ಯತೆ ಇದೆ.
ಸಿಟಿ ಇಂಡಿಯಾ ತನ್ನ ಗ್ರಾಹಕ ಬ್ಯಾಂಕಿಂಗ್ ವ್ಯವಹಾರದ ಮಾಲೀಕತ್ವವನ್ನು ಆಯಕ್ಸಿಸ್ ಬ್ಯಾಂಕ್ಗೆ ವರ್ಗಾಯಿಸಿದೆ. ಇದು 2023 ಮಾರ್ಚ್ 1ರಿಂದ ಚಾಲನೆಗೆ ಬರುತ್ತದೆ… ಈಗಿರುವ ಎಲ್ಲಾ ಸಿಟಿ ಪ್ರಾಡಕ್ಟ್ಗಳು ಮತ್ತು ಸೇವೆಗಳು, ಬ್ರ್ಯಾಂಚ್ಗಳು, ಎಟಿಎಂಗಳು, ಇಂಟರ್ನೆಟ್ ಬ್ಯಾಂಕಿಂಗ್ ಮತ್ತು ಸಿಟಿ ಮೊಬೈಲ್ ಆಯಪ್ಗಳು ಹಾಗೆಯೇ ಮುಂದುವರಿಯುತ್ತವೆ ಎಂದು ಸಿಟಿಬ್ಯಾಂಕ್ ಇಂಡಿಯಾ ತನ್ನ ಅಧಿಕೃತ ವೆಬ್ಸೈಟ್ನಲ್ಲಿ ತಿಳಿಸಿದೆ.
ಇತ್ತೀಚಿನ ಸುದ್ದಿಗಳಿಗಾಗಿ ಈಗಲೇ ಡೌನ್‌ ಲೋಡ್‌ ಮಾಡಿ:
https://play.google.com/store/apps/details?id=com.speed.newskannada
