ಪುನೀತ್ ಸಾವಿನ ವಾರ್ತೆಯನ್ನು ಕೇಳಿ ಅನೇಕರು ಹೃದಯಾಘಾತದಿಂದ ಮೃತಪಟ್ಟಿದ್ದರೆ ಇನ್ನೂ ಕೆಲವರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಆದರೆ ಪುನೀತ್ ನಮ್ಮನಗಲಿ ಇಷ್ಟೊಂದು ಸಮಯ ಕಳೆದಿದ್ದರೂ ಸಹ ಅವರ ಸೋದರತ್ತೆ ನಾಗಮ್ಮಗೆ ತನ್ನ ಪ್ರೀತಿಯ ಸೋದರಳಿಯ ಇನ್ನಿಲ್ಲ ಎಂಬ ವಿಚಾರ ಇನ್ನೂ ತಿಳಿದಿಲ್ಲವಂತೆ..!
90 ವರ್ಷ ಪ್ರಾಯದ ನಾಗಮ್ಮ ವರನಟ ಡಾ. ರಾಜ್ಕುಮಾರ್ರ ಸಹೋದರಿ. ನಾಗಮ್ಮ ಕುಟುಂಬದಲ್ಲಿಯೇ ಹಿರಿಯರು ಹಾಗೂ ಅಪ್ಪು ಅಂದರೆ ಇವರಿಗೆ ಪಂಚಪ್ರಾಣ. ಡಾ. ರಾಜ್ಕುಮಾರ್ ಮಕ್ಕಳನ್ನು ನಾಗಮ್ಮನೇ ನೋಡಿಕೊಂಡಿದ್ದಾರೆ. ಪುನೀತ್ ಕೂಡ ಆಗಾಗ್ಗೆ ಗಾಜನೂರಿನಿಗೆ ಭೇಟಿ ನೀಡುವ ಮೂಲಕ ತನ್ನ ಪ್ರೀತಿಯ ಸೋದರತ್ತೆಯನ್ನು ಭೇಟಿಯಾಗುತ್ತಿದ್ದರು. ಪುನೀತ್ ರಾಜ್ಕುಮಾರ್ ಇನ್ನಿಲ್ಲ ಎಂಬ ಸುದ್ದಿ ಇಂದಿಗೂ ನಾಗಮ್ಮರಿಗೆ ತಿಳಿದಿಲ್ಲ. ಇಡೀ ರಾಜ್ ಕುಟುಂಬ ನಾಗಮ್ಮರ ಆರೋಗ್ಯ ದೃಷ್ಟಿಯನ್ನು ಗಮನದಲ್ಲಿಟ್ಟುಕೊಂಡು ಈ ಗೌಪ್ಯತೆಯನ್ನು ಕಾಪಾಡಿಕೊಂಡು ಬಂದಿದೆ.
ಪುನೀತ್ ನೆನಪಾದಾಗೆಲ್ಲ ನಾಗಮ್ಮ ಅಪ್ಪು ಎಲ್ಲಿ ಎಂದು ಕೇಳುತ್ತಾರಂತೆ. ಇದಕ್ಕೆ ಮನೆಯವರು ಪುನೀತ್ ಶೂಟಿಂಗ್ ನಿಮಿತ್ತ ವಿದೇಶದಲ್ಲಿದ್ದಾರೆ. ಶೀಘ್ರದಲ್ಲಿಯೇ ಹಿಂತಿರುಗುತ್ತಾರೆ ಎಂದು ಹೇಳಲಾಗುತ್ತದೆಯಂತೆ.
ಪುನೀತ್ ಸಿನಿಮಾವನ್ನು ನಾಗಮ್ಮ ನೋಡುತ್ತಾ ಖುಷಿ ಪಡುತ್ತಾರೆ. ಕೆಲವು ವರ್ಷಗಳ ಹಿಂದೆ ರಾಘವೇಂದ್ರ ರಾಜ್ಕುಮಾರ್ಗೆ ಹೃದಯಾಘಾತವಾದ ಸುದ್ದಿ ಕೇಳಿ ನಾಗಮ್ಮ ಹಾಸಿಗೆ ಹಿಡಿದಿದ್ದರು. ಅವರಿಗೆ ಅಪ್ಪು ಸಾವಿನ ಸುದ್ದಿಯನ್ನು ಸಹಿಸಲು ಸಾಧ್ಯವೇ ಇಲ್ಲ. ಹೀಗಾಗಿ ನಾವು ಗೌಪ್ಯತೆ ಕಾಪಾಡುತ್ತಿದ್ದೇವೆ ಎಂದು ಕುಟುಂಬ ಸದಸ್ಯರೊಬ್ಬರು ಹೇಳಿದ್ದಾರೆ.
ಇತ್ತೀಚಿನ ಸುದ್ದಿಗಳಿಗಾಗಿ ಈಗಲೇ ಡೌನ್ ಲೋಡ್ ಮಾಡಿ:
https://plಇay.google.com/store/apps/details?id=com.speed.newskannada