ಬಾಲಿವುಡ್ ನಟ ವಿಕ್ಕಿ ಕೌಶಲ್ ಹೆಸರು ಅಂಡರ್ 19 ವಿಶ್ವಕಪ್ನಲ್ಲಿ ಸ್ಪರ್ಧಿಸುತ್ತಿರುವ ಭಾರತ ತಂಡದ ಸ್ಕೋರ್ ಕಾರ್ಡ್ನಲ್ಲಿ ಕಾಣಿಸಿಕೊಂಡಿದೆ. ಸದ್ಯ ಅಂತರ್ಜಾಲದಲ್ಲಿ ಈ ಚಿತ್ರ ವೈರಲ್ ಆಗಿದೆ.ಬಾಲಿವುಡ್ನಲ್ಲಿ ನಟ ವಿಕ್ಕಿ ಕೌಶಲ್ ಜನಪ್ರಿಯತೆ ಏರುತ್ತಿದೆ.
ಮಾಸ್ ಹೀರೋ ಎನ್ನುವುದಕ್ಕಿಂತ ಪಾತ್ರ ಪ್ರಧಾನ ಚಿತ್ರಗಳ ಆಯ್ಕೆಯಿಂದ ಅವರು ಹೆಚ್ಚು ಗಮನ ಸೆಳೆಯುತ್ತಿದ್ದಾರೆ. ಇತ್ತೀಚೆಗೆ ನಟಿ ಕತ್ರಿನಾ ಕೈಫ್ ಅವರೊಂದಿಗೆ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿರುವ ವಿಕ್ಕಿ ಕೌಶಲ್ಗೆ ಸೋಷಿಯಲ್ ಮೀಡಿಯಾದಲ್ಲೂ ಫ್ಯಾನ್ಸ್ ಸಂಖ್ಯೆ ದಿನದಿಂದ ದಿನಕ್ಕೆ ಏರುತ್ತಲೇ ಇದೆ. ಇದೀಗ ಅಭಿಮಾನಿಗಳು ವಿಕ್ಕಿ- ಕೌಶಲ್ ಬಗ್ಗೆ ಅಚ್ಚರಿಯ ವಿಚಾರವೊಂದನ್ನು ಗಮನಿಸಿದ್ದು, ಸಖತ್ ಸುದ್ದಿಯಾಗುತ್ತಿದೆ. ಅದೇನು ಅಂತೀರಾ? ವಿಕ್ಕಿ ಕೌಶಲ್ ಹೆಸರು ನಿನ್ನೆ (ಶನಿವಾರ) ನಡೆದ ಅಂಡರ್-19 ವಿಶ್ವಕಪ್ನ ಪಂದ್ಯದಲ್ಲಿ ಕಾಣಿಸಿಕೊಂಡಿದೆ! ಭಾರತ ಹಾಗೂ ಬಾಂಗ್ಲಾದೇಶದ ನಡುವೆ ನಡೆದ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಹೆಸರು ಕಾಣಿಸಿಕೊಂಡಿದ್ದು, ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ. ಇದನ್ನು ನಟ ಕೂಡ ತಮ್ಮ ಇನ್ಸ್ಟಾಗ್ರಾಂ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ. ವಿಕ್ಕಿ ಕೌಶಲ್ ಹೆಸರು ಸ್ಕೋರ್ ಕಾರ್ಡ್ನಲ್ಲಿ ಬರುವುದು ಹೇಗೆ ಸಾಧ್ಯ ಎಂದು ಯೋಚಿಸುತ್ತಿದ್ದೀರಾ? ಇಲ್ಲಿದೆ ಉತ್ತರ.
ವಿಕ್ಕಿ ಕೌಶಲ್ ಹೆಸರು ಭಾರತ ತಂಡದ ಸ್ಕೋರ್ ಪಟ್ಟಿಯಲ್ಲಿ ಕಾಣಿಸಿಕೊಂಡಿದ್ದು ಕಾಕತಾಳೀಯವಾಗಿ! ಹೌದು. ಭಾರತ ಅಂಡರ್ 19 ತಂಡದಲ್ಲಿ ವಿಕ್ಕಿ ಒಸ್ಟ್ವಾಲ್ ಹಾಗೂ ಕೌಶಲ್ ತಾಂಬೆ ಎಂಬ ಇಬ್ಬರು ಆಟಗಾರರಿದ್ದಾರೆ. ಬಾಂಗ್ಲಾದೇಶ ವಿರುದ್ಧದ ಪಂದ್ಯದಲ್ಲಿ ಒಬ್ಬರ ಹಿಂದೆ ಮತ್ತೊಬ್ಬರು ವಿಕೆಟ್ ಪಡೆದಿದ್ದಾರೆ. ಸ್ಕೋರ್ ಕಾರ್ಡ್ನಲ್ಲಿ ಈ ಆಟಗಾರರ ಮೊದಲ ಹೆಸರನ್ನು ಹಾಕಲಾಗಿತ್ತು. ಇದರಂತೆ ವಿಕ್ಕಿ ಹಾಗೂ ಕೌಶಲ್ ಎಂದು ಹೆಸರು ಕಾಣಿಸಿಕೊಂಡಿತ್ತು.ಈ ಕಾಕತಾಳೀಯ ಗಮನಿಸಿದ ಅಭಿಮಾನಿಗಳು ಸ್ಕ್ರೀನ್ಶಾಟ್ ತೆಗೆದು ಹಂಚಿಕೊಂಡಿದ್ದಾರೆ. ಇದನ್ನು ವಿಕ್ಕಿ ಕೌಶಲ್ ಕೂಡ ಗಮನಿಸಿದ್ದಾರೆ. ಇಂದು (ಭಾನುವಾರ) ಬೆಳಗ್ಗೆ ತಮ್ಮ ಇನ್ಸ್ಟಾಗ್ರಾಂ ಖಾತೆಯಲ್ಲಿ ಚಿತ್ರ ಹಂಚಿಕೊಂಡಿರುವ ಅವರು, ‘ಎಲ್ಲರ ಮೆಸೇಜ್ಗಳಿಗೆ ಧನ್ಯವಾದಗಳು. ಭಾರತ ಅಂಡರ್ 19 ತಂಡಕ್ಕೆ ಶುಭವಾಗಲಿ’ ಎಂದು ಬರೆದುಕೊಂಡಿದ್ದಾರೆ
ಇತ್ತೀಚಿನ ಸುದ್ದಿಗಳಿಗಾಗಿ ಈಗಲೇ ಡೌನ್‌ ಲೋಡ್‌ ಮಾಡಿ:
https://play.google.com/store/apps/details?id=com.speed.newskannada
