ನವದೆಹಲಿ: ‘ಆರಂಭಿಕ ಸಾರ್ವಜನಿಕ ಕೊಡುಗೆಯು (ಐಪಿಒ) ಕಂಪನಿಗೆ ಒಂದು ಅವಿಸ್ಮರಣೀಯ ಅವಕಾಶ. ಹಾಗಾಗಿ, ಬಂಡವಾಳ ಮಾರುಕಟ್ಟೆ ಸ್ಥಿತಿಯು ಸ್ಥಿರವಾಗುವವರೆಗೂ ಐಪಿಒಗೆ ಬರುವುದಿಲ್ಲ’ ಎಂದು ಮೊಬಿಕ್ವಿಕ್ ಅಧ್ಯಕ್ಷೆ ಉಪಾಸನಾ ತಕು ತಿಳಿಸಿದ್ದಾರೆ.
2022ರ ನವೆಂಬರ್ವರೆಗೂ ಐಪಿಒಗೆ ಅವಕಾಶ ಇದೆ. ಸದ್ಯ, ಮಾರುಕಟ್ಟೆ ವರ್ತನೆಯು ಏರಿಳಿತಗಳಿಂದ ಕೂಡಿದೆ. ಇಂತಹ ಸಂದರ್ಭದಲ್ಲಿ ಅಪಾಯಕ್ಕೆ ಒಡ್ಡಿಕೊಳ್ಳಲು ಬಯಸುವುದಿಲ್ಲ ಎಂದು ಹೇಳಿದ್ದಾರೆ. ಕಂಪನಿಯು ಐಪಿಒ ಮೂಲಕ ₹ 1,500 ಕೋಟಿ ಸಂಗ್ರಹಿಸುವ ನಿರೀಕ್ಷೆ ಇಟ್ಟುಕೊಂಡಿದೆ.
ಐಪಿಒಗೆ ಸಲ್ಲಿಸಿರುವ ಕರಡು ದಾಖಲೆ ಪತ್ರಗಳಲ್ಲಿ ಇರುವ ಮಾಹಿತಿಯ ಪ್ರಕಾರ, ಕೋವಿಡ್ ಸಾಂಕ್ರಾಮಿಕದಿಂದಾಗಿ ವಹಿವಾಟಿನ ಮೇಲೆ ಪರಿಣಾಮ ಉಂಟಾಗಿದೆ. ಬೈ ನೌ ಪೆ ಲೇಟರ್ (ಬಿಎನ್ಪಿಎಲ್) ವಹಿವಾಟಿನ ಮೌಲ್ಯವು 2020-21ರಲ್ಲಿ ₹ 299.94 ಕೋಟಿಯಷ್ಟಾಗಿದೆ. 2019-20ರಲ್ಲಿ ಇದ್ದ ₹ 485.49 ಕೋಟಿಗೆ ಹೋಲಿಸಿದರೆ ಶೇ 38.22ರಷ್ಟು ಇಳಿಕೆ ಆಗಿದೆ.
ಸದ್ಯ ವಹಿವಾಟು ಕೋವಿಡ್ಗೂ ಮುಂಚಿನ ಮಟ್ಟವನ್ನು ದಾಟಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಬಿಎನ್ಪಿಎಲ್ ವಹಿವಾಟು 22 ಪಟ್ಟು ಹೆಚ್ಚಾಗಿದೆ. ಪಾವತಿ ವಹಿವಾಟು ಮೂರು ಪಟ್ಟು ಬೆಳವಣಿಗೆ ಕಂಡಿದೆ ಎಂದು ಅವರು ಹೇಳಿದ್ದಾರೆ.
ಇತ್ತೀಚಿನ ಸುದ್ದಿಗಳಿಗಾಗಿ ಈಗಲೇ ಡೌನ್ ಲೋಡ್ ಮಾಡಿ:
https://play.google.com/store/apps/details?id=com.speed.newskannada