ಸ್ಯಾಂಡಲ್‌ವುಡ್‌ನಲ್ಲಿ ಕ್ರೀಡೆಯನ್ನು ಆಧರಿಸಿದ ಸಿನಿಮಾಗಳ ಸಂಖ್ಯೆ ತೀರಾ ವಿರಳ ಎಂದೇ ಹೇಳಬಹುದು. ಕ್ರೀಡೆ ಎಂದಾಗ ಎಲ್ಲರೂ ಕ್ರಿಕೆಟ್‌ನತ್ತಲೇ ಮುಖ ಮಾಡುತ್ತಾರೆ. ಆದರೆ ನಟ ಆದ್ಯ ತಿಮ್ಮಯ್ಯ ಎಂ. ಅವರು ಹಾಕಿ ಕ್ರೀಡೆ ಬಗ್ಗೆ ಸಿನಿಮಾ ಮಾಡಿದ್ದಾರೆ. ಹೌದು, ತಾವೇ ಹೀರೋ ಆಗಿ ನಟಿಸುವುದರ ಜೊತೆಗೆ ಆ ಸಿನಿಮಾವನ್ನು ನಿರ್ಮಾಣ ಮಾಡಿ, ನಿರ್ದೇಶನವನ್ನು ಕೂಡ ಮಾಡಿದ್ದಾರೆ. ಸದ್ಯ ಟ್ರೇಲರ್ ಲಾಂಚ್ ಆಗಿದ್ದು, ಸಿನಿಮಾ ತೆರೆಗೆ ಬರಲು ಸಿದ್ಧವಾಗಿದೆ. ಈ ಸಿನಿಮಾಗೆ ‘ಜರ್ಸಿ ನಂಬರ್ 10’ ಎಂದು ಟೈಟಲ್ ಇಟ್ಟಿದ್ದಾರೆ.ಚಿತ್ರದ ಬಗ್ಗೆ ಮಾಹಿತಿ ನೀಡುವ ಆದ್ಯ ತಿಮ್ಮಯ್ಯ, ‘ನಮ್ಮ ಸಿನಿಮಾವು ಹಾಕಿ ಕ್ರೀಡೆ ಕುರಿತು ಇದೆ. ಹಾಕಿಯಲ್ಲಿ ಸಾಧನೆ ಮಾಡಬೇಕು ಎಂದು ಹೀರೋ ಅಂದುಕೊಂಡಿರುತ್ತಾನೆ. ಆತ ತನ್ನ ಗುರಿಯನ್ನು ಸಾಧಿಸಲು ಎಷ್ಟು ಕಷ್ಟಪಡುತ್ತಾನೆ? ಇಂಡಿಯಾ ಟೀಮ್‌ಗೆ ಸೆಲೆಕ್ಟ್ ಆಗುತ್ತಾನಾ ಎಂಬುದೇ ಕಥೆ. ಇದರಲ್ಲಿ ಲವ್ ಸ್ಟೋರಿ, ಆಕ್ಷನ್, ಸೆಂಟಿಮೆಂಟ್ ಎಲ್ಲವೂ ಇದೆ. ಆತ ಜಿಲ್ಲಾ ಮಟ್ಟದ ಹಾಕಿ ಆಟಗಾರ ಆಗಿರುತ್ತಾನೆ. ದತ್ತಣ್ಣ ಅವರು ಹೀರೋ ತಾತನ ಪಾತ್ರ ಮಾಡಿದ್ದಾರೆ. ಹೀರೋಗೆ ತುಂಬ ಕೋಪ ಇರುತ್ತದೆ. ಅದರಿಂದ ಆತ ಬದುಕಿನಲ್ಲಿ ಸಾಕಷ್ಟು ಕಳೆದುಕೊಳ್ಳುತ್ತಾನೆ. ಇಷ್ಟೆಲ್ಲ ಕಷ್ಟಗಳನ್ನು ಅನುಭವಿಸಿ, ಆತ ಟೀಮ್‌ ಇಂಡಿಯಾಗೆ ಆಡುತ್ತಾನಾ ಅನ್ನೋದೇ ಕಥೆ’ ಎಂದು ಹೇಳುತ್ತಾರೆ.ನಮ್ಮ ಸಿನಿಮಾಗೆ ಥ್ರಿಲ್ಲರ್ ಮಂಜು ಅವರು ಸಾಹಸ ನಿರ್ದೇಶನ ಮಾಡಿದ್ದಾರೆ. ನಾಲ್ಕು ಫೈಟ್‌ಗಳಿವೆ. ಒಂದು ಪ್ರಮುಖ ಪಾತ್ರವನ್ನು ಚಂದನ್ ಆಚಾರ್ ಮಾಡಿದ್ದಾರೆ. ನಾನು ಕೊಡಗಿನವನು. ನಮ್ಮ ಕೊಡಗಿನಲ್ಲಿ ಹಾಕಿ ಕ್ರೀಡೆ ಜಾಸ್ತಿ ಇದೆ. ನಾನು ಸಿನಿಮಾರಂಗಕ್ಕೆ ಬರುವುದಕ್ಕೂ ಮುನ್ನ ಮಾಡಲಿಂಗ್ ಮಾಡುತ್ತಿದ್ದೆ. ಏನಾದರೂ ವಿಭಿನ್ನವಾಗಿ ಸಿನಿಮಾ ಮಾಡಬೇಕು ಎಂಬ ಉದ್ದೇಶದಿಂದ ಈ ಸಿನಿಮಾ ಮಾಡಿದ್ದೇನೆ. ನಾವು ಚಿಕ್ಕ ವಯಸ್ಸಿನಿಂದಲೂ ಹಾಕಿಯನ್ನು ನೋಡಿಕೊಂಡೇ ಬೆಳೆದಿದ್ದೇವೆ. ನಾನು ಕೂಡ ಹಾಕಿ ಆಟಗಾರ..’ ಎಂದು ಮಾಹಿತಿ ಹಂಚಿಕೊಳ್ಳುತ್ತಾರೆ ಅವರು.
ಇತ್ತೀಚಿನ ಸುದ್ದಿಗಳಿಗಾಗಿ ಈಗಲೇ ಡೌನ್‌ ಲೋಡ್‌ ಮಾಡಿ:
https://play.google.com/store/apps/de…
