ಅಪ್ಪು ಅವರ ಕೊನೇ ಚಿತ್ರ ಜೇಮ್ಸ್ ಮಾ.17ರಂದು ವಿಶ್ವಾದ್ಯಂತ ತೆರೆಕಂಡಿದ್ದು, ಭಾರವಾದ ಮನಸ್ಸಿನಲ್ಲೇ ಸಿನಿಮಾ ನೋಡುತ್ತಿದ್ದಾರೆ. ಅಪ್ಪು ನೆನೆದು ಕಣ್ಣೀರಿಡುತ್ತಿದ್ದಾರೆ. ಈ ನೋವು ಜೇಮ್ಸ್ ತಂಡಕ್ಕೂ ಹೊರತಾಗಿಲ್ಲ. ಜೇಮ್ಸ್ ಸಿನಿಮಾದಲ್ಲಿ ಅಪ್ಪು ಸ್ನೇಹಿತನ ಪಾತ್ರ ಮಾಡಿರುವ ನಟ ಶೈನ್ ಶೆಟ್ಟಿ ‘JAMES’ನ ರೀಲ್ ಮತ್ತು ರಿಯಲ್ ರಹಸ್ಯ ಬಿಚ್ಚಿಟ್ಟಿದ್ದಾರೆ.
ದಿಗ್ವಿಜಯ ನ್ಯೂಸ್ ಜತೆ ಮಾತನಾಡಿದ ಶೈನ್ ಶೆಟ್ಟಿ, ‘ಜೇಮ್ಸ್ ಸಿನಿಮಾದಲ್ಲಿ ನಾವು ಐದು ಜನ J.A.M.E.S.(ಜೇಮ್ಸ್) ಸ್ನೇಹಿತರು. ಅದರಲ್ಲಿ ‘S’ ಅಂದ್ರೆ ಸಂತೋಷ್. ನಾವು ನಾಲ್ಕು ಜನ(J.A.M.E.) ಸತ್ತೋಗ್ತೀವಿ. ಅಪ್ಪು ಸರ್(ಸಂತೋಷ್) ಒಬ್ಬರು ಉಳಿದುಕೊಳ್ತಾರೆ. ನಿಜ ಜೀವನದಲ್ಲಿ ನಾವು ನಾಲ್ಕು ಜನ ಉಳ್ಕೊಂಡಿದ್ದೀವಿ. ಆದರೆ ಅಪ್ಪು ಸರ್ ಇಲ್ಲ. ಪ್ರೀ ರಿಲೀಸ್ ಕೂಡ ಅದೇ ಗ್ರೌಂಡ್ನಲ್ಲಿ ಆಯ್ತು…’ ಎನ್ನುತ್ತಲೇ ಭಾವುಕರಾದರು.
‘ಜೇಮ್ಸ್ ಸಿನಿಮಾ ಶೂಟಿಂಗ್ ನನಗೆ ಶೂಟಿಂಗ್ ಅನ್ನಿಸಲೇ ಇಲ್ಲ. ನಾವೆಲ್ಲ ಅಪ್ಪು ಸರ್ ಜತೆ 13 ದಿನ ಇದ್ವಿ ಅನ್ನಿಸುತ್ತಿತ್ತು. ನಾನು ಅಪ್ಪು ವ್ಯಕ್ತಿತ್ವಕ್ಕೆ ನಾನು ಅಭಿಮಾನಿ ಆದೆ. ಪುನೀತ್ ಸರ್ ಜತೆ ಶುರುವಾದ ನನ್ನ ಜರ್ನಿ ಕೊನೆಗೆ ಅಪ್ಪು ಅಣ್ಣಾ ಎನ್ನುವ ತನಕ ಬಂತು. ಅವರ ಮೊದಲ ನೋಟದಲ್ಲೇ ಇಂಪ್ರೆಷನ್ ಆಗಿಬಿಡ್ತೀವಿ. ‘ಏನ್ ಮಾಡ್ತಾ ಇದ್ದೀರಿ ಶೈನ್ ನೀವು?’ ಅಂತ ಅಪ್ಪು ಸರ್ ಕೇಳಿದ್ರು. ಸಣ್ಣದೊಂದು ಹೋಟೆಲ್ ಮಾಡಿದ್ದೀನಿ, ದಸರಾ ಹಬ್ಬದ ದಿನ ಉದ್ಘಾಟನೆ ಇದೆ ಅಂದೆ. ‘ಓಹ್ ನೀವು ನನ್ನ ಕರೆಯಲ್ವಾ’ ಅಂದ್ರು. ಸರ್ ದೊಡ್ಡ ಹೋಟೆಲ್ ಮಾಡಿದಾಗ ಕರೀತಿನಿ ಅಂದೆ. ‘ಹೇ ಇದಕ್ಕೂ ಬರ್ತೀನಿ’ ಅಂದ್ರು. ನನಗೆ ಖುಷಿ ಜತೆಗೆ ಶಾಕ್ ಆಯ್ತು. ದೊಡ್ಡ ನಟ ನನ್ನ ಹೋಟೆಲ್ಗೆ ಬಂದು ಉದ್ಘಾಟನೆ ಮಾಡಿದ್ರು… ಇದು ನನ್ನ ಪುಣ್ಯ’ ಎನ್ನುತ್ತಲೇ ಶೈನ್ ಶೆಟ್ಟಿ ಭಾವುಕರಾದರು.
ಇತ್ತೀಚಿನ ಸುದ್ದಿಗಳಿಗಾಗಿ ಈಗಲೇ ಡೌನ್ ಲೋಡ್ ಮಾಡಿ:
https://plಇay.google.com/store/apps/details?id=com.speed.newskannada