ನವದೆಹಲಿ: ಯಾವುದೇ ಪರಿಸ್ಥಿತಿ ಎದುರಾಗಲಿ ನಾನು ನಿನ್ನ ಕೈ ಬಿಡುವುದಿಲ್ಲ… ಇದು ಸಾಮಾನ್ಯವಾಗಿ ಎಲ್ಲ ಪ್ರೇಮಿಗಳು ತಾವು ಪ್ರೀತಿಸುವವರಿಗೆ ಹೇಳುವ ಮಾತು. ಆದರೆ, ಇದಕ್ಕೆ ವಿರುದ್ಧವಾದ ವಿಡಿಯೋವೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ತನ್ನ ಪ್ರಾಣವನ್ನು ಉಳಿಸಿಕೊಳ್ಳಲು ವ್ಯಕ್ತಿಯೊಬ್ಬ ತನ್ನ ಪ್ರೇಯಸಿಯನ್ನು ಬಿಟ್ಟು ಓಡಿ ಹೋದ ವಿಡಿಯೋ ವೈರಲ್ ಆಗಿದೆ. ಲ್ಯಾನ್ಸ್ ಹೆಸರಿನ ಟ್ವಿಟರ್ ಖಾತೆಯಲ್ಲಿ ವಿಡಿಯೋ ಶೇರ್ ಮಾಡಲಾಗಿದ್ದು, ಈವರೆಗೆ 10 ಮಿಲಿಯನ್ಗೂ ಅಧಿಕ ವೀಕ್ಷಣೆ ಕಂಡಿದೆ. ಅಲ್ಲದೆ, 2 ಲಕ್ಷಕ್ಕೂ ಅಧಿಕ ಮಂದಿ ವಿಡಿಯೋ ಲೈಕ್ ಮಾಡಿದ್ದು, 28 ಸಾವಿರಕ್ಕೂ ಅಧಿಕ ಮಂದಿ ರೀಟ್ವೀಟ್ ಮಾಡಿದ್ದಾರೆ. 3 ಸಾವಿರಕ್ಕೂ ಅಧಿಕ ಮಂದಿ ವಿಡಿಯೋ ಪ್ರತಿಕ್ರಿಯೆ ನೀಡಿದ್ದಾರೆ.
ವಿಡಿಯೋದಲ್ಲಿ ಏನಿದೆ?
ರೆಸ್ಟೋರೆಂಟ್ ಒಂದರಲ್ಲಿ ಮಹಿಳೆಯೊಬ್ಬಳು ತನ್ನ ಬಾಯ್ಫ್ರೆಂಡ್ ಜೊತೆ ಕುಳಿತಿರುತ್ತಾಳೆ. ಇದೇ ಸಮಯದಲ್ಲಿ ಟೋಪಿ ಧರಿಸಿ, ಮುಖಕ್ಕೆ ಮಾಸ್ಕ್ ಹಾಕಿಕೊಂಡು ರೆಸ್ಟೋರೆಂಟ್ ಪ್ರವೇಶಿಸುವ ವ್ಯಕ್ತಿಯೊಬ್ಬ ತನ್ನ ಬ್ಯಾಗ್ನಿಂದ ಗನ್ ತೆಗೆದು ಇತರರನ್ನು ಹೆದರಿಸುತ್ತಾನೆ. ಈ ವೇಳೆ ತನ್ನ ಪ್ರೇಯಸಿಯನ್ನು ಕಾಪಾಡುವ ಬದಲು ಬಾಯ್ಫ್ರೆಂಡ್ ಅಲ್ಲಿಂದ ಎಸ್ಕೇಪ್ ಆಗಿದ್ದಾನೆ. ಇದನ್ನು ನೋಡಿದ ಪ್ರೇಯಸಿಗೆ ಒಂದು ಕ್ಷಣ ಶಾಕ್ ಆಗಿದ್ದಾಳೆ. ಸುಲಿಗೆಕೋರ ರೆಸ್ಟೋರೆಂಟ್ನಲ್ಲಿ ಇತರರ ಬಳಿ ಸುಲಿಗೆ ಮಾಡಿ ಮೊಟರ್ ಬೈಕ್ನಿಂದ ಪರಾರಿಯಾಗುತ್ತಾನೆ. ಅಲ್ಲಿಯವರೆಗೂ ಮಹಿಳೆ ತನ್ನ ಕುರ್ಚಿಯಲ್ಲಿ ಕುಳಿತ್ತಿರುತ್ತಾಳೆ. ಆದರೆ, ಬಾಯ್ಫ್ರೆಂಡ್ ಮಾತ್ರ ಎಸ್ಕೇಪ್ ಆಗಿರುತ್ತಾನೆ. ಸುಲಿಗೆಕೋರ ಹೋದ ಬಳಿಕ ಮಹಿಳೆ ತನ್ನ ಬಾಯ್ಫ್ರೆಂಡ್ ಹುಡುಕಿಕೊಂಡು ಹೋಗುತ್ತಾಳೆ.
ವಿಡಿಯೋ ಶೇರ್ ಮಾಡಿಕೊಂಡಿರುವ ಟ್ವಿಟರ್ ಬಳಕೆದಾರ ಎಲ್ಲದಕ್ಕಿಂತ ಸ್ವಯಂ ಸಂರಕ್ಷಣೆ ಮೊದಲು ಎಂದು ಅಡಿಬರಹ ನೀಡಿದ್ದಾರೆ. ಇದೀಗ ವಿಡಿಯೋ ನೋಡಿ ನೆಟ್ಟಿಗರು ತರಹೇವಾರಿ ಕಾಮೆಂಟ್ ಮಾಡುತ್ತಿದ್ದಾರೆ. ವಿಡಿಯೋ ನಿಮಗೆ ಏನು ಅನಿಸಿತು ಎಂಬುದನ್ನು ಕಾಮೆಂಟ್ ಮೂಲಕ ನಮಗೆ ತಿಳಿಸಿ.
https://play.google.com/store/apps/details?id=com.speed.newskannada
