ಜನವರಿ 22, ಶಾಲಿನಿ ಅವರ ಜನ್ಮದಿನ. ಉಡುಪಿಯವರಾದ ಅವರು ಪ್ರಸಕ್ತದಲ್ಲಿ ಬೆಂಗಳೂರು ನಿವಾಸಿ.
ಶಾಲಿನಿ ಮೂರ್ತಿ ಅವರು ಉದ್ಯಮಗಳಲ್ಲಿ ಪಾಲುಗಾರ್ತಿಯಾಗಿ ಹೆಲ್ತ್‌ಕೇರ್, ಅಗ್ರಿಟೆಕ್ ಉಕರಣಗಳು, ಜಲನಿರ್ವಹಣಾ ಉಪಕರಣಗಳು ಹಾಗೂ ಆರ್ಟಿಫಿಷಿಯಲ್ ಇಂಟೆಲಿಜೆನ್ಸ್ ಮುಂತಾದ ಹಲವು ತಂತ್ರಜ್ಞಾನ ಉತ್ಪಾದನೆ ಮತ್ತು ನಿರ್ವಹಣಾ ಸಂಸ್ಥೆಗಳಲ್ಲಿ ಪಾತ್ರವಹಿಸಿದ್ದವರು. ಅವರು 12 ವರ್ಷಗಳ ಕಾಲ ಎಲೆಕ್ಟ್ರಾನಿಕ್ ಸಿಟಿಯಲ್ಲಿನ ಉದ್ಯಮಗಳ ಸಂಘದ ಟ್ರಸ್ಟಿಯಾಗಿದ್ದರು. ಸರ್ಕಾರಿ ಶಾಲೆಗಳ ನಿರ್ವಹಣೆ ಮತ್ತು ಅಭಿವೃದ್ಧಿ ಸೇರಿದಂತೆ ವಿವಿಧ ಸಾಮಾಜಿಕ ಚಟುವಟಿಕೆಗಳು ಇವರ ಆ ಜವಾಬ್ದಾರಿ ನಿರ್ವಹಣೆಯ ಕ್ಷೇತ್ರವಾಗಿತ್ತು.
ಹಲವಾರು ವಲಯಗಳಲ್ಲಿ “ಹಸಿರು ಮಹಿಳೆ” ಎಂದು ಪ್ರಸಿದ್ಧರಾದ ಶಾಲಿನಿ ಮೂರ್ತಿ ಅವರು ಎಲೆಕ್ಟ್ರಾನಿಕ್ಸ್ ಸಿಟಿ ಮತ್ತು ಸುತ್ತಮುತ್ತ 15,000 ಮರಗಳನ್ನು ನೆಡುವ ಜವಾಬ್ದಾರಿಯನ್ನು ನಿರ್ವಹಿಸಿದವರು. ಪರಿಸರ, ಮಾನವತೆಯ ಸಹಾನುಭೂತಿ ಮತ್ತು ಶುಚಿತ್ವದ ಆದರ್ಶಗಳೊಂದಿಗೆ ಹೊಂದಿಕೆಯಾಗುವ ಯಾವುದೇ ಚಟುವಟಿಕೆಯಲ್ಲಿ ತಮ್ಮನ್ನು ನಿರಂತರವಾಗಿ ತೊಡಗಿಸಿಕೊಳ್ಳುವುದು ಇವರಲ್ಲಿನ ಸದಾಶಯ.
ಪಾಕತಜ್ಞೆಯಾದ ಶಾಲಿನಿ ಮೂರ್ತಿ ಅವರಿಗೆ, ತಮ್ಮಲ್ಲಿನ ಪಾಕಪ್ರೀತಿ ಮತ್ತು ತಮ್ಮ ಊರಾದ ಕರಾವಳಿ ಪ್ರದೇಶದ ಉಡುಪಿಯ ಮೇಲಿನ ಪ್ರೀತಿ ‘ಬಾಳ್ಗಾ’ ಎಂಬ ನವ ಅತಿಥಿ ಸತ್ಕಾರ ಯೋಜನೆಯನ್ನು ರೂಪಿಸಲು ಪ್ರೇರಿಸಿತು. ಇದು ಅನೇಕ ಸಮೂಹಗಳಿಗಾಗಿ ಹಲವಾರು ಕಾರ್ಯಕ್ರಮಗಳನ್ನು ಆಯೋಜಿಸಿದೆ.
ಶಾಲಿನಿ ಮೂರ್ತಿ ಅವರ ಬರಹಗಳಲ್ಲಿ ಪ್ರಕೃತಿ ಪ್ರೇಮಕ್ಕೆ ಆದ್ಯಸ್ಥಾನ. ಪ್ರಕೃತಿ ಪ್ರೇಮ, ಪ್ರವಾಸ ಹಾಗೂ ಪ್ರಸ್ತುತ ಸಾಮಾಜಿಕ ವಿಷಯಗಳ ಕುರಿತಾದ ಅವರ ಬರಹಗಳು ನಿರಂತರ ಹಲವಾರು ಪತ್ರಿಕೆಗಳು ಮತ್ತು ನಿಯತಕಾಲಿಕೆಗಳಲ್ಲಿ ಮೂಡಿಬರುತ್ತಿವೆ. ‘ಅಜಾತಶತ್ರು’ ಎಂಬುದು ಅವರು ದಿವಂಗತ ಡಾ ಯು ಚಿತ್ತರಂಜನ್ ಅವರ ಮೇಲೆ ಮೂಡಿಸಿರುವ ಕೃತಿ.
ಶಾಲಿನಿ ಮೂರ್ತಿ ಅವರು ತಾವು ರೂಪಿಸಿರುವ ‘ಶಾಲಿನಿ ಆಂಟಿಯ ಕಥಾತೋರಣ’ ಯೂಟ್ಯೂಬ್ ವಿಡಿಯೋ ಸರಮಾಲೆಯಲ್ಲಿ ವಿಶೇಷವಾಗಿ ಮಕ್ಕಳನ್ನು ಮನದಲ್ಲಿಟ್ಟು ಅನೇಕ ಕಥಾನಕಗಳನ್ನು ರೂಪಿಸಿ ಪ್ರಸ್ತುತಪಡಿಸುತ್ತ ಬಂದಿದ್ದಾರೆ. ಅವು ಪುಸ್ತಕಗಳಾಗಿಯೂ ಮೂಡಿ ಜನಪ್ರಿಯಗೊಂಡಿವೆ.
ಶಾಲಿನಿ ಮೂರ್ತಿ ಅವರು ‘ಕಥೆಗಳ ತೋರಣ’ಕ್ಕೆ ಶಿವಮೊಗ್ಗದ ಕರ್ನಾಟಕ ಸಂಘದ ಪುಸ್ತಕ ಬಹುಮಾನವಲ್ಲದೆ ಅನೇಕ ಸಂಘ ಸಂಸ್ಥೆಗಳ ಗೌರವಗಳು ಇವರಿಗೆ ಸಂದಿವೆ.
ಇತ್ತೀಚಿನ ಸುದ್ದಿಗಳಿಗಾಗಿ ಈಗಲೇ ಡೌನ್‌ ಲೋಡ್‌ ಮಾಡಿ:
https://play.google.com/store/apps/details?id=com.speed.newskannada
Please follow and like us:
