ಪ್ರೇಯಸಿ ಜತೆಗಿನ ಮನಸ್ತಾಪಕ್ಕೆ ವಿಚಲಿತನಾಗಿದ್ದ ಭಗ್ನ ಪ್ರೇಮಿಯು ಆಕೆಯನ್ನು ಚಾಕುವಿನಿಂದ 10ಕ್ಕೂ ಹೆಚ್ಚು ಬಾರಿ ಬರ್ಬರವಾಗಿ ಇರಿದು ಕೊಲೆ ಮಾಡಿರುವ ಘಟನೆ ಜೀವನ್‌ಬಿಮಾ ನಗರ ಬಳಿಯ ಮುರುಗೇಶ್‌ಪಾಳ್ಯದಲ್ಲಿ ಮಂಗಳವಾರ ನಡೆದಿದೆ.ಮುರುಗೇಶ್‌ಪಾಳ್ಯದ ಒಮೆಗಾ ಹೆಲ್ತ್‌ ಕೇರ್‌ ಮ್ಯಾನೇಜ್‌ಮೆಂಟ್‌ ಸವೀರ್‍ಸಸ್‌ ಪ್ರೈವೆಟ್‌ ಲಿಮಿಟೆಡ್‌ ಕಚೇರಿಯಲ್ಲಿ ಕೆಲಸ ಮಾಡುತ್ತಿದ್ದ ಲೀಲಾ ಪವಿತ್ರಾ (25) ಕೊಲೆಯಾದ ಯುವತಿ. ಆರೋಪಿ ದಿನಕರ್‌ನನ್ನು ಬಂಧಿಸಲಾಗಿದೆ. ಆಂಧ್ರಪ್ರದೇಶ ಮೂಲದ ಲೀಲಾ ಪವಿತ್ರಾ ಮತ್ತು ದಿನಕರ್‌, ಸುಮಾರು 5 ವರ್ಷಗಳಿಂದ ಪ್ರೀತಿಸುತ್ತಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.ಲೀಲಾ ಪವಿತ್ರಾ ಪೋಷಕರಿಗೆ ಇತ್ತೀಚೆಗೆ ಮಗಳ ಪ್ರೀತಿಯ ವಿಷಯ ಗೊತ್ತಾಗಿತ್ತು. ದಿನಕರ್‌ ಬೇರೆ ಜಾತಿಯವನಾದ ಕಾರಣಕ್ಕೆ ಆತನ ಜತೆ ಮಗಳ ಮದುವೆ ಮಾಡಲು ಪೋಷಕರು ನಿರಾಕರಿಸಿದ್ದರು. ಜತೆಗೆ ಆತನ ಜತೆ ಮಾತನಾಡದಂತೆ ಮಗಳಿಗೆ ಸೂಚಿಸಿದ್ದರು. ಈ ನಡುವೆ ಮದುವೆ ವಿಚಾರವಾಗಿ ದಿನಕರ್‌ ಮತ್ತು ಲೀಲಾ ಪವಿತ್ರಾ ನಡುವೆ ಜಗಳವಾಗಿತ್ತು. ಹೀಗಾಗಿ, ಲೀಲಾ ದಿನಕರ್‌ ಜತೆ ಮಾತನಾಡುತ್ತಿರಲಿಲ್ಲ. ದಿನಕರ್‌, ಲೀಲಾ ಮೊಬೈಲ್‌ಗೆ ಹಲವು ಬಾರಿ ಕರೆ ಮಾಡಿ ಮಾತನಾಡಲು ಯತ್ನಿಸಿದ್ದ. ಆದರೆ, ಲೀಲಾ ಕರೆ ಸ್ವೀಕರಿಸಿರಲಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.ಇದರಿಂದ ವಿಚಲಿತನಾಗಿದ್ದ ದಿನಕರ್‌, ಲೀಲಾರ ಕಚೇರಿ ಬಳಿ ಬಂದು ಕಾದು ಕುಳಿತಿದ್ದ. ಲೀಲಾ ರಾತ್ರಿ 7.30 ರ ಸುಮಾರಿಗೆ ಕಚೇರಿಯಿಂದ ಹೊರ ಬರುತ್ತಿದ್ದಂತೆ ಅವರ ಮೇಲೆ ಎರಗಿದ ಆರೋಪಿ ಮನಸೋ ಇಚ್ಛೆ ಚಾಕುವಿನಿಂದ ಇರಿದು ಕೊಲೆ ಮಾಡಿದ್ದಾನೆ. ದಿನಕರ್‌, ದೊಮ್ಮಲೂರಿನ ಲೋಗಿಸ್‌ ಹೆಲ್ತ್‌ಕೇರ್‌ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದ. ಲೀಲಾ ಪವಿತ್ರಾ ಎಂ.ಎಸ್ಸಿ ಪದವೀಧರೆ ಎಂದು ಪೊಲೀಸರು ಹೇಳಿದ್ದಾರೆ. ಜೀವನ್‌ಬಿಮಾ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಇತ್ತೀಚಿನ ಸುದ್ದಿಗಳಿಗಾಗಿ ಈಗಲೇ ಡೌನ್ ಲೋಡ್‌ ಮಾಡಿ:
https://play.google.com/store/apps/details?id=com.speed.newskannada
